VIKEKE, 17 Fevereiru 2025 (TATOLI)—Komadante Polísia Nasionál Timor Leste (PNTL) munisípiu Vikeke, Superintendente Antonio Rego Fernandes, informa ínisiu fulan-Janeiru to’o Dezenbru 2024 ne’e PNTL muisípiu Vikeke rejista kazu violénsia doméstika hamutuk 98 kompara ho kazu sira seluk.
“Hahú husi Janeiru to’o Dezenbru tinan kotuk, ami rejista kazu ne’ebé númeru aas liu mak violénsia doméstika, ita kompara ba kazu sira seluk ne’e númeru kiik,” Superintendente Antonio Rego Fernandes hateten ba Agência Tatoli, iha ninia kna’ar fatin Base Camp, ohin.
Tuir nia, kona-ba kazu seluk hanesan kazu ofensa simples hamutuk 95, kazu suisídiu neen (6), kazu ameasa rua (2), kazu omisídiu rua (2) no kazu sira seluk ne’e iha lima (5), entaun totál kazu hamutuk 296.
“Husi kazu sira-ne’ebé ami rejista ne’e, ami lori ba rejistu iha Ministériu Públiku (MP) hamutuk kazu 256, kazu rezolve tuir família hamutuk 33 no kazu pendente hamutuk neen (6),” nia dehan.
Nia dehan, kazu ne’ebé rejista iha 2024 ne’e númeru tun kompara ba kazu sira-ne’ebé rejista iha tinan 2023 ne’e númeru kazu sa’e makaas liu.
“Ita haree ba kazu tinan 2024 nian, kompara kazu 2023 ita iha kazu hamutuk 330, entaun iha tinan 2024 kazu redús signifikandu. Kazu sira-ne’e redús tanba ita iha atividade Polísiamentu Komunitáriu, ita halo iha suku sira no halo enkontru ho komunidade entaun neineik bele redús kazu sira-ne’e,” nia hateten.
Nia dehan, iha tinan 2025 PNTL kontinua sensibliza ba komunidade iha munisípiu Vikeke atu oinsá kria pás no establidade hodi redús kazu sira-ne’ebé rejista iha PNTL liuliu ba kazu sira-ne’ebé númeru aas hanesan kazu violénsia doméstika.
“Tanba, atu redús kazu sira-ne’e, fila-fali ba ema ida-idak ninia konsiénsia rasik, hafoin ita bele redús,” nia dehan.
Enkuantu, tuir dadus membru PNTL munisípiu Vikeke rejista kazu ho totál hamutuk na’in-139 ne’ebé rekolla husi postu administrativu lima (5) inklui kapitál munisípiu Viqueque.
Jornalisra : Vitorino Lopes da Costa
Editór : Cancio Ximenes
