KOVALIMA, 18 fevereiru 2025 (TATOLI)– Diretór Eskola Bázika Sentrál Gala, Candido Ramos Mendonça orienta no bandu profesór sira uza mídia sosiál Facebook halo difamasaun ba ema seluk.
“Ha’u orienta ona ba profesór sira, labele uza mídia sosiál Facebook difama ema seluk iha futuru”, Candido Ramos Mendonça informa ba jornalista sira iha Kovalima, ohin.
Ezekutivu estabelesimentu ensinu ne’e dehan, bazeia simu orientasaun husi Servisu Edukasaun Kovalima atu kontrola profesór sira no bandu profesór uza mídia sosiál halo difamasaun ba ema seluk.
“Ita uza mídia sosiál tau status ema hotu akompaña tan ne’e ha’u aseita orientasaun husi Diretora edukasaun labele uza mídia sosiál hodi difama ema seluk”, diretór ne’e dehan.
Uza mídia atu aprende
Diretora Servisu munisípiu Edukasaun Kovalima, Elda de Fatima, esplika, nia parte fó hanoin bebeik ona katak profesór sira labele halo difamasaun ema seluk iha mídia Sosiál.
“Ha’u informa bebeik labele tau status iha Facebook, maibé nafatin akontese. Ita-nia dirijente mak la pasa informasaun ka oinsá? Bazeia ba esperénsia profesór husi Maucola hakerek status hodi hasai liafuan ladun di’ak. Ita uza mídia atu aprende la’ós atu difama ema”, nia preokupa no fó hanoin.
Notísia relevante:TIC Timor, I.P rekoñese la fásil deteta konta facebook falsu
Jornalista:Celestina Teles
Editór :Rafael Ximenes de A. Belo
