DILI, 18 Fevereiru 2025 (TATOLI)—Embaixadora Filipina ba Timor-Leste, Anne Padua, hasoru-malu ho Ministru Komérsiu no Indústria, Filipus Nino Pereira, hodi diskute kona-ba apoiu Filipina nian ba Timor-Leste liuhosi Ministériu Komérsiu no Indústria (MCI-sigla portugés).
Governante ne’e dehan, Primeiru-Ministru, Xanana Gusmão halo ona vizita ba Filipina no Ministru Negósiu Estranjeiru no Kooperasaun, Bendito Freitas asina memorandu iha área polítika no ekonómika.
“Embaixadora nia vizita ne’e atu hametin kooperasaun entre Timor-Leste ho Filipina, ne’ebé durante ne’e koopera malu iha área polítika no ekonomia. Entaun, vizita ne’e atu haree área hirak-ne’e hodi dezenvolve empreza mikro, ki’ik no médiu no área téknika no ami hakarak asaun liuhosi memorandu ne’ebé asina ona,” Nino Pereira dehan ba jornalista sira, iha Gabinete MCI, Bebora, tersa ne’e.
Ministru ne’e esplika, Timor-Leste presiza kapasita no dezenvolve produsaun ne’ebé inovativa, tanba ne’e presiza formasaun hodi hasa’e koñesimentu kona-ba embalajen produtu no promosaun merkadoria. Tanba ne’e, ministériu sei konvida embaixada Filipina hodi partisipa iha Expo Internasionál Dili no buka oportunidade ba investidór Filipina sira atu investe iha Timor-Leste.
Notísia relevante: PR Horta ho Embaixadór Filipina diskute adezaun Timor-Leste ba ASEAN
Governante ne’e hatutan katak empreza mikro, ki’ik no médiu mak xave hodi hahú ekonomia nasaun nian, tanba Filipina iha esperiénsia ida-ne’e, ne’e duni Governu presiza asaun mútua entre Filipina no Timor-Leste.
Nia hateten katak kestaun ida hosi apoiu Governu Filipina maka apoiu polítiku kona-ba adezaun Timor-Leste nian ba Asosiasaun hosi Nasaun sira Sudeste Aziátiku (ASEAN-sigla inglés).
“Ami apresia ho apoiu ne’ebé konsistente ba Timor-Leste nia adezaun bá ASEAN no ami presiza nafatin rekursu umanu no husu ba embaixadora nia asisténsia téknika ba ami-nia servisu ne’ebé liga ho ASEAN,” Nino sujere.
Entretantu, Embaixadora Filipina iha Timor-Leste, Anne Padua, hateten katak Filipina hakarak haree oportunidade atu ajuda empreza mikro, ki’ik no médiu sira iha Timor-Leste.
“Filipina hakarak ajuda apoia Timor-Leste iha área agrikultura, peska no mós kompromisu Filipina nian ajuda Timor-Leste adere ba ASEAN,” nia konklui.
Jornalista: Felicidade Ximenes
Editór: Xisto Freitas da Piedade
