VIKEKE, 18 Fevereiru 2025 (TATOLI)—Diretór Programa Nasionál Dezenvolvimentu Suku (PNDS) munisípiu Vikeke, Francisco Soares Varela, informa progresu konstrusaun fíziku Uma Naroman ba Povu (UNP) iha munisípiu Vikeke totál hamutuk unidade 481 no maiória atinje ona 95%.
“Kona-ba UNP ne’ebé hahú implementa iha tinan 2022 to’o mai fulan-Fevereiru 2025 nian ne’ e, uma totál 481maiória atinje ona 95% ba leten. Daudaun ne’e, uma balun hela pinta no dada eletrisidade sira ba uma UNP sira,” Diretór PNDS munisípiu Viqueque ne’e hateten ba Agência Tatoli iha ninia kna’ar fatin, Beloi, ohin.
Diretór PNDS ne’e salienta, dada eletrisidade mak autoridade suku sira tenke halo koordenasaun no administrativu hafoin instala uma UNP sira no kona-ba mobiliáriu postu Vikeke, Uatulari, Ossu hatama ona, hela postu Lakluta no Uatukarabu mak seidauk ramata.
“Ami kontinua halo aproximasaun ba fornesedór sira hodi konklui mobiliáriu hanesan kama, meza no kulxaun (esponza) no seluktán. Atu tama inaugurasaun uma UNP ne’e iha suku Bulale, maibé ne’e depende ba autoridade sira mak planu ba inaugurasaun tanba orsamentu aloka PNDS latama ba iha programa inaugurasaun hotu,” nia hateten.
Tuir dadus, UNP ne’ebé implementa’ iha munisipiu Viqueque totál hamutuk unidde 481 ne’ebé konstrui iha postu administrativu Uatucarbau, Lacluta, Viqueque Vila, Ossú no postu Uatulari iha tinan 2022 ho tipu normál unidade 356 ho kustu $6.052.000 no UNP +A implementa iha postu Ossú no Uatulari iha unidade 125 ho kustu $1.625.000.
Iha fati seluk, xefe Suku Irabin de Baixo, postu Uatucarbau, José Baptista do Carmo, haktuir iha tinan 2022 suku Irabin de Baixo hetan UNP regulér hamutuk unidade sia (09) ne’ebé implemeta iha aldeia tolu mak hanesan aldeia Taradai uma tolu, Makaki uma tolu no aldeia Makusa uma tolu ne’ebé ninia konstrusaun fíziku finaliza ona.
“UNP iha ami-nia suku uma unidade sia (9), maibé konstrusaun fíziku ramata hotu ona no ami hatama hotu mobiliáriu sira hanesan meza, kadeira, kama, armariu no sasán dapur nian hanesan bikan, kanuru no seluktán. Ami-nia finaliza ona, hein atu entrega ba benifísiariu sira,” nia dehan.
Jornalista : Vitorino Lopes da Costa
Editór : Cancio Ximenes
