Ahi han uma ida iha Babulu deskonfia tanba sirkuitu liña eletrisidade
VIKEKE, 19 Fevereiru 2025 (TATOLI)—Ahi han uma ida no dapur ida iha aldeia Ababere, suku Babulu, postu administrativu Uatulari, munisípiu Viqueque, iha tuku 08h00 dadersaan, iha kuarta (19 fevereiru 2025) ne’e, dekonfia tanba sirkuitu liña eletrisidade.
Delegadu aldeia Abadere, suku Babulu, Sebestião Ismadi Pinto, haktuir akontese insendiu ka ahi han uma iha dadeersan ne’e, uma na’in ka vítima ba tuur tiha iha li’ur, derrepente ahi han iha uma boot nia laran laran, nune’e vítima sira halai ba uma laran labele, tanba ahi lakan makaas tiha ona..
“Nune’e, ami autoridade hamutuk Ofisiál Polisiamentu Suku (OPS) ba haree hotu iha fatin akontesementu ahi han uma. Iha insendiu ne’e, deskonfia kazu husi sirkuitu liña eletrisidade tanba iha dadersaan ne’e uma-na’in la sunu ahi ruma iha uma laran no dapur laran,” Delegadu Abadere ne’e hateten ba Agência Tatoli liuhusi telefónika, ohin.
Nia relata, kronólojia akontese ahi han uma mutin (zinku) iha dadeersan ne’ebé ahi han uluk iha uma boot laran, hafoin ahi nani-da’et ba dapur ne’ebé besik iha uma boot nia hun, ne’ebé ahi han moos hotu.
“Akontesementu ne’e, sasán sira iha uma la salva hotu tanba forsa ahi boot liu. Nune’e, ohin verifika sasán uma laran ne’ebé ahi han hotu mak hanesan dokumentu, roupa, osan $1000, sasán dapur hanesan sana, bikan, kanuru no hare kaut ida ahi han moos hotu,” nia realata.
Reprezentante vítima, Grigorio Brito, informa akontesementu ne’e kauza husi sirkuitu elétrika (eletrsidade) tanba iha li’ur rona tarutu dala ida iha uma laran ne’e, ahi komesa lakan ona.
“Dadersaan ne’e ami la sunu ahi, família sira ba tuur iha li’ur derrepente ami rona ba uma laran taruta dala ida, ne’ebé ami halai ba, haree ne’e ahi lakan makas tiha ona. Ne’ebé, atu tama ba uma laran hodi salva sasán sira ne’e labele ona. Tan ne’e, sasán sira-ne’e rai iha uma boot no dapur laran ami la salva hotu,” nia haktuir.
Iha fatin seluk, Komnadante Autoridade Protesaun Sivil (APC, sigla portugés) munisípiu Vikeke, Cirilio Soares Gomes, hateten akontesementu insendiu iha suku Babulu ne’e ekipa APC Vikeke dezloka ona ba fatin akontesementu, maibé to’o iha dalan kerreta avaria nune’e ekipa sira fila-fali mai munisípiu hodi ba halo manutensaun ba karreta.
“Akontesementu ohin ne’e ami orienta ekipa sira dezloka ba fatin akontesementu, maibé to’o iha área Uatulari karreta aat tiha. Nune’e sira fila-0fali mai munisípiu hodi lori karreta ba Dili hlo manutesaun. Depois fila husi Dili mak ekipa sira ba halo verifikasaun uma ne’ebé ahi han ne’e,” nia dehan.
Tuir dadus, vítima afetadu ba akontesementu insendiu ne’ebé hela iha uma ne’e lidera husi xefe família Amandio Jeca de Carbalho ho totál membru família hamutuk na’in-lima (5).
Jornalista : Vitorino Lopes da Costa
Editór : Cancio Ximenes
