VIKEKE, 19 Fevereiru 2025 (TATOLI)—Diretór Servisu Edukasaun Munisípiu Vikeke, Julio Sakadura, informa implementasaun programa merenda eskolár munisípiu Vikeke sei implementa iha fulan-Marsu tanba Prezidente Autoridade Munisípiu (PAM) foin selebra kontratu ho Ekipa Jestaun Programa (EJP) merenda eskolár.
“Implementasaun programa merenda eskolár foin lalais tersa (17/02) ami foin asina kontratu ho grupu EJP sira husi eskola Ensinu Báziku Sentrál (EBC, sigla portugés) hamutuk 18. Nune’e, ha’u fó atensaun ba EJP sira katak sira tenke implementa programa merenda eskolár ne’e ho loloos, tuir menu ne’ebé iha. Maibé, iha implementasaun mak la tuir menu, diretór eskola sira tenke hasai EJP sira,” Julio Sakadura hateten ba Agência Tatoli, iha postu Vikeke Vila, ohin.
Nia dehan, loron efetiva ba programa merenda eskolár ba Ensinu Pre-Eskolár (EPE) durasaun loron 117 no EBC inklui filiál sira implementa durasaun 104.
“Durante ne’e, ita observa dezafiu ne’ebé ita-nia EJP sira enfrenta iha implementasaun Programa merenda eskolár liuliu kuzina no bee-moos mak sai difikuldade. Tan ne’e, ha’u ko’alia ona ba diretór eskola sira hodi koordena ho xefe suku no Programa Nasionál Dezenvolvimentu Suku (PNDS) hodi konstrui kuzina ba eskola sira no dada bee-moos, atu ita-nia EJP uza hodi prepara ai-han ba ita-nia oan sira,” nia dehan.
Implementasaun programa merenda eskolár ba tinan 2025 ne’e ho totál estudante kompostu husi EPE no EBC hamutuk 18 no Ensinu Báziku Filiál hamutuk 77 ho totál ema hamutuk 20.651, ho totál orsamentu hamutuk $915,425. Husu orsamentu ne’e fahe ba EPE hamutuk $95,836 no aloka ba EBC hamutuk $819,589.
Iha fatin seluk, Diretór EBC Iraler, Afonso Pinto, haktuir kona-ba implementasaun programa merenda eskolár nian ne’e, EBC Iraler nia estudante hamutuk na’in-437 mak sai benifisiáriu.
“Ami-nia eskola selebra ona kontratu ba implementasaun programa merenda eskolár, maibé dezafiu ne’ebé ami hasoru mak kuzina ka dapurr no bee-moos. Ba bee-moos PNDS dada ona, maibé seidauk finanliza. Ne’ebé, ami ne’e difikulta makbee-moos. Kona-ba implementasaun ami sei kumpre ba menu, maibé produtu lokál mak la sufisiente hodi fornese ba programa merenda eskolár,” nia hateten.
Jornalisra : Vitorino Lopes da Costa
Editór : Cancio Ximenes
