VIKEKE, 19 Fevereiru 2025 (TATOLI)—Koordenadora Ensinu Báziku Filiál (EBF) Lasama, suku Luca, postu Vikeke Vila, munisípiu Vikeke, Eliza Soares, informa EBF Lasana menus fasilidade mobiliáriu eskolár, nune’e estudante sira partisipa ensinu aprendizajén tenke tuur iha rai.
“Husi inisiu edifísiu EBF Lasama finaliza konstrusaun saladeaula tolu (3), ami lahetan mobiliáriu eskolár hanesan kadeira no meza to’o agora. Ne’ebé, kadeira no meza ne’ebé daudaun ne’e iha sala laran ne’e kada sala ida ami tau haat, lima no neen, ne’ebé ami hetan husi eskola sentrál. Estudante sira partisipa ensinu aprendizajén ne’e balun mak tuur iha kadeira no estudante balun tenke tuur iha rai,” Eliza Soares hateten ba Agência Tatoli, iha postu Vikeke Vila, ohin.
Problema menus fasilidade kadeira no meza ne’e, nia hateten, hahú enfrenta husi loke eskola EBF Lasama iha tinan 2013 to’o agora seidauk hetan apoiu ruma husi Governu.
“Iha mandatu Governu Konstitusionál da-ualu (VIII) nian, vise Ministru Eduksaun (ME) António Guterres vizita ami-nia eskola dala ida, haree ami-nia sala mamuk. Nune’e, nia promete ba ami atu koloka kaderia no meza hamutuk 50 ba ami maibé kadeira no meza distribui mai to’o munisípiu, ami la hetan maibé eskola seluk mak kala hetan fali,” nia hateten.
Problema seluk, nia dehan, EBF Lasama daudaun ne’e menus mós profesór no saladeaula hamutuk tolu (3) ne’ebé la sufisiente ba estudante EBF Lasama husi primeiru ano, segundu ano no terseiru ano ne’e aprende iha varanda mak simu lisaun husi profesór sira tanba aula la to’o ba estudante sira.
“Ami-nia eskola, menus profesór ba matéria lingua englés, matematika, enkonómia no lingua portugés. Foin lalais kolokasaun profesór ne’e ami la hetan. Aleinde ne’e, ami iha sala tolu mak ami uza ba edifisíu no uza ba ensinu apredizajen. Husi probelama sira-ne’e, ha’u hato’o ona Servisu Edukasaun Munisípiu Vikeke no nasionál, maibé seidauk hetan resposta ba ami-nia preokupasaun sira-ne’e,” nia hateten.
Tanba ne’e, nia husu Ministériu Edukasaun (ME) hodi tau matan ba EBF Lasama nia problema menus profesór, kadeira, meza no saladeaula.
“Ami hakarak husu ba Ministériu Edukasaun tau matan ba ami-nia eskola liuliu profesór, kadeira no meza. Konstrui edifisíu no sanita agora ami laiha,” nia dehan.
Tuir dadus, estudante EBF Lasama husi primeiru ano to’o terseiru ano ne’e, iha totál estudante hamutuk na’in-103 no totál profesór hamutuk na’in-ualu (8).
Iha fatin seluk, Diretór Servisu Edukasaun munisípiu Vikeke, Julio Sakadura, haktuir kona-ba menus fasilidade, menus no saladeaula ne’e responsável sira nafatin hato’o pedidu mai munisípiu hodi relata ba nasionál.
“Kona-ba problema sira-ne’e nafatin haruka pedidu mai ami, atu nune’e ita hato’o ba lojistika nasionál hodi haree meza no kadeira. Tanba, eskola barak menus fasilidade sira-ne’e, ita la rezolve dala ida maibé sei rezolve fazeadamente,” nia subliña.
Jornalisra : Vitorino Lopes da Costa
Editór : Cancio Ximenes
