Governu autoriza transferénsia millaun $16 ba atividade Timor GAP iha 2025
DILI, 19 Fevereiru 2025 (TATOLI) – Ministru Petróleu no Rekursu Minerál, Francisco Monteiro, aprezenta prosposta ba Konsellu Ministru ne’ebé hetan ona autorizasaun hodi halo tranferénsia públika ho montante millaun $16 ba empreza estatál Timor GAP.
Ministru Prezidénsia Konsellu Ministru, Agio Pereira, hateten orsamentu millaun $16 ne’e hodi garante finansiamentu ba atividade no programa estratéjiku husi Timor GAP, E.P ba tinan 2025.
“Proposta ne’ebé Ministru Petróleu no Rekursu Minerál aprezenta ne’e husi Konsellu Ministru atu fó autorizasaun tranferénsia osan millaun $16 ba ajénsia Timor Gap E.P hodi hala’o sira-nia serbisu ba tinan 2025”, Agio Pereira reitera iha Palásiu Governu, ohin.
Timor GAP, E.P hanesan empreza estatál ne’ebé atua iha setór petróleu no gás, liuliu iha atividade peskiza, produsaun iha onshore no offshore, armajenamentu, refinasaun, prosesamentu, distribuisaun no venda petróleu, ho nia derivada hanesan gás naturál, kualkér idrokarbonetu nomós prosesamentu industriál husi petróleu no indústria petrokímika seluk.
Entidade estatál ne’e asume mós knaar importante iha dezenvolvimentu projetu Tasi-Mane ne’ebé hanesan prioridade estratéjiku Governu no Estadu nian, hodi apoia reformulasaun panorama enerjétiku.
Asume mós papél importante iha dezenvolvimentu rekursu enerjétiku, kria oportunidade servisu no transferénsia kompeténsia no teknolójia nomós apoiu dezenvolvimentu sosiuekonómik.
Jornalista: Arminda Fonseca
Editora: Maria Auxiliadora
