Guarda Florestál Vikeke defisil kontrola ema tesi ai ilegál
VIKEKE, 20 Fevereiru 2025 (TATOLI)—Xefe Departamentu Reprezentante Territoriál Servisu Agrikultura munisípiu Vikeke, Julio Pinto Ribeiro, hateten guarda floresta iha Vikeke na’in-14 no tékniku na’in-rua (2) de’it, nune’e defisil tebes atu kontrola ema tesi ai ilegál.
“Ita-nia Guarda Florestál no tékniku sira-nia kontratu servisu ramata iha 31 dezembru 2024. Nune’e, depois kontratu hotu to’o agora sira seidauk asina fila-fali sira-nia kontratu hodi hala’o servisu, tanba ne’e desizaun husi nasionál mak bele deside. Maibé, forsa serbisu menus difisil ba servisu Florestál Vikeke hodi kontrola hotu to’o área remota sira, posiblidade ida-ne’e ema tesi ai ilegál bela aumenta,” Julio Pinto Ribeiro hateten ba Agência Tatoli, iha Beloi, tersa (18 Fevereiru 2025) ne’e.
Maske Guarda Florestál seidauk asina kontratu, maibé nu’udar timoroan sira iha diretu hodi kontrola ai-horis sira iha munisípiu Vikeke.
“Ita-nia Guarda sira seidauk asina kontratu maibé nu’udar timoroan sira iha diretu atu halo kontrola mós ba ita-nia ai-horis sira. Tanba, ita la kontrola bele fó impaktu ba klímatika hanesan inundasaun ne’ebé akontese iha fatin-fatin. Tan ne’e, ema-nia hahalok sira-ne’ebé tesi ai arbiru nune’e presiza guarda hodi kontrola,” nia dehan.
Maibé, nia dehan, Guarda sira-ne’e servisu voluntáriu tanba departamentu mós labele fó orientasaun ba guarda sira hodi hala’o servisu ba kontrolu ba ema tesi ai ilegal sira iha Vikeke, tanba Guarda sira ne’e seidauk asina kontratu.
“Guarda sira, ami labele fó orientasaun ba sira. Tanba la’o mak hetan dezastre ruma, família sira husu ami, sé mak responsabliza. Maske agora daudaun ami menus rekursu, maibé ami kontinua servisu tuir forsa ne’ebé mak ami iha. Área balun, ami labele kontrolu hotu tanba Vikeke área luan,” nia dehan.
Dezafiu, nia hateten, Departamentu Reprezentante Territoriál Servisu Agrikultura munisipiu Vikeke enfrenta ba menus rekursu umanu liuliu ba Guarda no transporte hanesan motorizada ba funsionáriu sira uza ba hala’o kna’ar.
“Dezafiu ida-ne’ebé ami hasoru mak menus rekursu, transporte hanesan motorizada, ami iha karreta patroli ne’e ida maibé kondisaun mak ladun di’ak. Husi dezafiu sira-ne’e ami hato’o ona relatatóriu ba nasionál tanba ami delegasaun territoriál,” nia hateten.
Entretantu, tuir dadus, funsionáriu servisu iha Departamentu Reprezentante Territoriál Servisu Agrikultura munisipiu Vikeke totál hamutuk na’in-20 ne’ebé kompostu husi funsionáriu permanente hamutuk na’in-neen (6) mak hala’o servisu no na’in-14 seidauk asina kontratu.
Jornalisra : Vitorino Lopes da Costa
Editór : Cancio Ximenes
