DILI, 20 Fevereiru 2025 (TATOLI) – Prezidente Komisaun B iha Parlamentu Nasionál (PN), ne’ebé trata asuntu Negósiu, Estranjeiru, Defeza no Seguransa, Augusto Domingos ‘Deker’, rekomenda ba Ministériu Interiór (MI) no Komandu Jerál Polísia Nasionál Timor-Leste (PNTL), tenke profisionál mo tau sees interese família, tanba rekrutamentu ne’e ho objetivu fundamental serbí Povu no Nasaun.
“Rekrutamentu ba PNTL, ha’u hanesan Prezidente Komisaun B ko’alia, ezije beIbeik ba Ministériu Interiór no Komandu PNTL katak, rekrutamentu komisaun ne’ebé responsabiliza ba prosesu tenke hasees-aan iha interese hotu-hotu,’’ nia ko’alia iha resintu PN, kinta ne’e.
Nia husu ema hira-ne’ebé tama iha ekipa komisaun tenke profisionál no tau sees interese família, grupu, arte-marsiál no rituál. Tanba atu prepara ema-ne’ebé iha espíritu nasionalizmu no patriotizmu serbí loos de’it nia rai no povu, hodi kumpre lei ho orden bazea ba konstituisaun ne’e tenke ema ne’ebé neutru.
Antes ne’e, iha 05 Fevereiru Konsellu Ministru aprova ona proposta rekrutamentu ba membru PNTL foun no promosaun diviza ba membru polísia sira. Membru PNTL ne’ebé mak Governu liuhusi Komandu Jerál PNTL atu rekruta mak hamutuk 500 kompostu husi ajente na’in-400 no ofisiál na’in-100.
Komandante Pesoa no Formasaun, Superintendente Xefe Polísia, Arquimino Ramos, hateten abertura ba rekrutamentu membru PNTL foun hein diploma ministeriál husi MI.
Nia informa kona-ba kritériu rekrutamentu Komandu Pesoa Formasaun antes ne’e enkamiña ona ba Komandate Jerál PNTL no Komandante Jerál mak iha kompeténsia hodi submete ba MI. Nune’e nia labele ko’alia kona-ba kritéria nune’e hein de’it diploma ministeriál.
Jornalista: Nelson de Sousa
Editór: Evaristo Soares Martins
