VIKEKE, 21 Fevereiru 2025 (TATOLI)—Ofisiál servisu sosiál iha suku Afalokai, postu Uatulari, munisípiu Vikeke, Epifania de Oliveira, husu Autoridade Protesaun Sivíl (APC, sigla portugés) no Servisu munisípiu Protesaun Sivil (SMPS) ba oin fahe apoia pakte emerjénsia tenke lori ba vítima dezastre naturál sira-nia uma.
“Iha fulan-Fevereiru ne’e mosu dezastre anin-boot no udan ne’ebé afeta ba komunidade suku Afalokai sira-nia uma anin sobu. Nune’e, ha’u rasik mak husu ekipa APC-SMPS ba halo verifikasaun ba komunidade nia uma hamutuk uma-kain 42 ne’ebé afetadu ba dezastre naturál. Iha tersa (18 fevereiru 2025) ne’e, vítima sira-ne’e aluga karreta mak simu sasán pakote emerjénsia ne’ebé difikulta tebes ba ita-nia komunidade ne’ebé la’o labele sira no balun osan laiha,” Epifania de Oliveira hateten ba Agência Tatoli, sesta ne’e.
Nune’e, nia dehan, APC-SMPS labele distribui direta ba vítima afetadu iha suku Afaloikai, maibé vítima sira mak lada ema ida tau osan hamutuk $6 hodi aluga karreta tula sira-nia sasán pakote emerjénsia iha armajen APC munisípiu Vikeke.
“Tanba ne’e, foin lalais tersa halo distribuisaun pakote ba vítima afetadu suku Afalokai nian iha munisípiu Vikeke, ha’u rekomenda kedas ba APC karik ba oin mosu tán dezastre naturál, lori kedas ba suku mak ami distribui ba vítima sira. Tanba ita-nia vítima sira enfrenta tiha susar, ita aumenta tán susar ba sira. Ha’u sujere mós ba diretór SMPS tenke haree mós asuntu sira-ne’e, atu labele akontese tan iha futuru,” nia dehan.
Hatán ba preokupasaun ne’e, Diretór SMPS Vikeke, Jeremias de Carbalho, rekoñese vítima sira husi Afalokai sira ba direta mak simu sasán pakote emerjénsia hanesan foos, mina, sardina, susu-been, supermie, biskuit no sasán dapur no sasán sira seluk.
“Foin lalais ne’e, vítima dezastre husi suku Afaloikai númeru boot. Ha’u konkorda funsionáriu suku nian hanoin ba oin, kuandu akontese dezastre númeru vítima boot ita aluga karreta hodi tula pakote emerjénsia, pelumenus to’o iha postu mak ita-nia vítima sira foti. Preokupasaun sira-ne’e ami tau ba konsiderasaun,” nia hateten.
Jornalista : Vitorino Lopes da Costa
Editór : Cancio Ximenes
