KOVALIMA, 21 fevereiru 2025 (TATOLI) – Ministru Komérsiu no Indústria, sesta ne’e, akompaña hosi Autoridade Kovalima halo observasaun direta ba iha merkadu munisípiu iha suku Kamenasa, postu administrativu Suai, munisípiu Kovalima, iha sesta ne’e.
“Ami mai identifika ona fatin ne’e, tinan kotuk identifikadu ho informasaun mai husi munisípiu. Rai importante ba dezenvolvimentu. Ita bele asegura katak interrese ba ema barak, rai ne’e konstrui merkadu iha futuru”, Ministru Komérsiu no Indústria, Filipos Nino Perreira dehan ba jornalista sira, hafoin observa merkadu Kamenasa, ohin.
Governante ne’e dehan, Kovalima iha potensialidade tanba lokaliza iha área fronteira no estratéjiku ba konstrusaun merkadu; ba iha área ekonomia.
“Ita defini ona atu konstrui merkadu iha fatin ne’e. Rai iha ne’e klaru. Ita espera tinan ne’e bele halo ona estudu no dezeñu, tinan oin implementa konstrusaun merkadu munisípiu Kovalima, tanba prevee ona orsamentu iha fundu infraestrutura iha MPIE atu halo estudu, dezeñu, foin bele hatene nia montante orsamentu”, nia informa.
Atu halo dezenvolvimentu ekonomia, membru governu ne’e dehan, importante tenke haree dezenvolvimentu partisipativu; hala’o atividade ekonómiku tenke envolve ema barak.
“Ita haree atividade ekonómiku la’o di’ak ita tenke iha infraestrutura dignu, bele fasilita movimentu ekonomia, konsentra fatin apropriadu, nune’e vendedór bele fila liman”, nia konsidera.
Iha vizita ne’e, Governante observa aleinde kondisaun merkadu halo mós observasaun ba produtu lokál ne’ebé mak vendedór sira fa’an iha merkadu Kamenasa.
Iha sorin seluk, Prezidente autoridade Munisípiu Kovalima, Miguel Armanda Cardoso haktuir katak merkadu iha Kamenasa konstrui iha tinan-2004; abandona, hafoin 2015 mak hamoos, bazar loron sábadu iha Kamenasa.
“Ita iha estrada atu asesu ba merkadu maibé estrada sai seidauk iha. Liuhusi aproximasaun ho ita-nia komunidade na’in ba rai, ita iha ona estrada atu sai”, nia dehan.
Autoridade Kovalima ne’e konta, iha tempu udan merkadu Kamenasa nakonu ho taho. Ho vizita Ministru Komérsiu no Indústria haree direita kondisaun merkadu tau iha planu nune’e 2026 bele halo ona konstrusaun.
Kona-ba kondisaun merkadu autoridade mós iha papél atu haree kondisaun balun, identifika toilet públiku tanba tenke forma ekipa ida hodi halo lavantamentu dadus oinsá bele rezolve.
Jornalista:Celestina Teles
Editór :Rafael Ximenes de A. Belo
