VIKEKE, 21 Fevereiru 2025 (TATOLI)—Xefe aldeia Kaidaua Lari, suku Makadiki, postu Uatulari, munisípiu Vikeke, Euzedia Amaral, preokupa parteira abandona servisu iha postu saúde Makadiki hodi atende no fó partu ba inan-isin rua sira.
“Husi fulan Janeiru to’o iha Fevereiru ne’e, ha’u haree iha postu saúde Makadiki ne’e, parteira sira abandona sira-nia servisu ba atendementu konsulta ba ita-nia inan isin-rua no fó partu ba inan isin-rua sira iha suku Makadiki,” Euzedia Amaral ateten ba Agência Tatoli, iha postu Uatulari, ohin.
Parteira ne’ebé koloka iha suku Makadiki hamutuk na’in-rua (2) maibé agora parteira sira-ne’e konsentra hotu iha sentru saúde Uatulari, nune’e postu saúde parteira laiha hodi atende ba inan isin-rua sira.
“Ami-nia inan feton sira atu partu iha postu saúde, parteira sira laiha, entaun inan isin-rua tenke selu karreta mak foin ba sentru saúde mak foin partu. Husi ami-nia suku Makadiki atu ba sentru saúde ne’e selu kareta $10, depois partu hotu fila mós tenke selu $10 hamutuk $20. Nune’e komunidade ne’ebé osan iha ne’e bele selu karreta, maibé ida osan laiha ne’e pasiénsia buka para partus iha uma de’it. Tan ne’e, ha’u sujere ba servisu saúde hodi koloka parteira permanente iha postu saúde Makadiki hodi labele difikulta ba inan isin-rua sira bainhira atu partu,” nia hateten.
Xefe Sentru Saúde postu Uatulari, Noe Amaral, hateten Sentru Saúde seidauk dada parteira husi postu saúde Makadiki maibé muda orariu atendementu iha sentru saúde Uatulari.
“Ha’u hakarak klarifika katak parteira ne’ebé koloka iha postu saúde Makadiki, ha’u seidauk muda sira mai sentru saúde maibé ami halo oráriu servisu ne’ebé parteira sira husi postu saúde Makadiki ne’e mai apoiu iha sentru saúde Uatulari, tanba parteira na’in-tolu (3) ne’ebé iha sentru saúde Uatulari ne’e agora dadaun na’in-rua (2) moras no na’in ida (1) gravida. Tan ne’e, mak parteira sira husi postu saúde sira Uatulari ne’e troka malu iha sentru saúde,” nia klarifika.
Nia dehan, bainhira oráriu sentru saúde Uatulari laiha mak parteira sira husi postu saúde hanesan Makadiki fila ba postu saúde hodi fó tratamentu ba inan isin-rua sira.
“Ha’u seidauk muda ema ida. Ha’u atu muda ema ida ba fatin seluk, ha’u relata ba autoridade sira hodi hatene,” nia dehan.
Tuir dadus, suku Makadiki iha aldeia 21 ho totál uma-kain hamutuk 1.773 no totál populasaun hamutuk 7.482, ne’ebé kompostu husi mane hamutuk 3.852 no feto hamutuk 3.630.
Daudaun ne’e, postu saúde lokaliza iha Makadiki de Cima ho aldeia ualu (8) ho totál uma-kain hamutuk 420 no abitante ho totál hamutuk na’in-600.
Enkuantu, suku Makadiki de Baixo ho aldeia hitu (7) hamutuk totál uma-kain 400 no abitante hamutuk na’in-650 no Suku Makadiki Uaitame ho aldeia hamutuk neen (6) ho total uma-kain 340 no abitante 899.
Jornalisra : Vitorino Lopes da Costa
Editór : Cancio Ximenes
