DILI, 21 Fevereiru 2024 (TATOLI)—Iha tinan 2024, traballadór timoroan sira iha Austrália no Koreia Súl remesa (haruka) osan dolar amerikanu 44.082.745,48 mai Timor-Leste (TL).
“Traballadór sira haruka osan kada fulan ba sira-nia família sira iha TL durante 2024 ne’e hamutuk dolar amerikanu millaun 44 resin,” Diretór Jerál Sekretaria Estadu Formasaun Profisionál no Empregu (SEFOPE), Carlito Rosário Cabral, hateten ba TATOLI iha nia kna’ar fatin, SEFOPE, sesta ne’e.
Diretór ne’e hatutan, traballadór sira transfere osan ne’e liuhosi Banco Nacional Ultramarino (BNU) no Banku Nasionál Komérsiu Timor-Leste (BNCTL-sigla portugés).
“Husi traballadór timoroan sira iha rai-li’ur hanesan Austrália haruka dólar amerikanu 21.354.404,48 no Koreia Súl transfere dólar amerikanu 22.728.341 iha tinan 2024 ba sira-nia familia,” nia relata.
Tuir diretór ne’e, traballadór sira transfere osan ne’e atu suporta no hadi’a ekonomia família nian.
“Traballadór timoroan sira serbisu iha rai-li’ur ho objetivu atu hetan osan no hetan esperiénsia. Tanba ne’e, durante ne’e, fulan-fulan sira haruka osan ba sira-nia família iha Timor,” nia haktuir.
Carlito Rosário Cabral hateten osan ne’ebé traballadór sira haruka sírkula iha Timor-Leste no garante melloramentu família nia ekonomia.
Antes ne’e, Governadór Banco Central Timor-Leste (BCTL), Helder Lopes, informa mós katak traballadór timoroan sira ne’ebé serbisu iha nasaun seluk hatama osan hamutuk millaun 204 mai TL iha tinan 2023.
“Ita nia fonte osan ida mak mai husi remesa. Iha tinan 2023, traballadór timoroan ne’ebé serbisu iha Inglaterra, Irlanda, Austrália, Koreia Súl no país sira seluk, sira haruka osan hamutuk millaun 204 (204.000.000,00) mai rai-laran. Kada tinan sempre aumenta,” Governadór BCTL hateten ba jornalista sira iha Palácio do Governo, 09 Maiu 2024.
Jornalista: Felicidade Ximenes
Editór: Xisto Freitas da Piedade
