KOVALIMA, 24 fevereiru 2025 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Kovalima, simu ona fixa reklamasaun no kontestasaun husi postu hitu hamutuk 1,819, iha Kovalima.
“Iha loron 19 fevereiru ne’e, Konsellu Munisípiu Kovalima submete ona fixa reklamasaun no kontestasaun ba Ministériu Asuntu Kombatente Libertasaun Nasionál hamutuk 1,819 mai husi postu administrativu hitu ba faze dahuluk”, Sekretáriu CLN Munisípiu Kovalima Joaquim da Costa “Sikatlet” hato’o iha Tabakolok, ohin.
Fixa reklamasaun no kontestasaun hamutuk 1,819 kompostu husi pesoál ne’ebé mak CLN, 3 a 7 hamutuk 315, 0 a 3 hamutuk 1,418 no la’ós Konsellu Libertasaun Nasionál (CLN) hamutuk na’in-64.
CLN ne’ebé hato’o kontestasaun 8 a 14 hamutuk 14, submete kontestasaun bazeia ba loron moris hanesan ho nia dokumentu hamutuk ualu. Ho nune’e Konsellu Munisipál husu ba diretór nasionál pensaun no subensaun atu halo rejista iha sistema ba dadus.
Hafoin submete fixa rihun ida-resin ne’e, nafatin fó oportunidade ba Konsellu Kombatente Libertasaun Nasionál atu foti fixa reklamasaun no kontestaun ba faze daruak nune’e konsellu atu submete ba iha nasionál.
Jornalista:Celestina Teles
Editór: Rafael Ximenes de A. Belo
