DILI, 24 Fevereiru 2025 (TATOLI)-Deputadu bankada Governu husi Kongresu Nasionál Rekonstrusaun Timorense (CNRT, sigla portugés), Gabriel Soares, husu entidade kompetente atu kontrola utilizadór mídia sosiál ne’ebé ho identidade falsa hodi ataka líder nasionál.
“Hakarak husu Governu favór kontrola ID falsu, gosta tolok no trata ita-nia líder sira, étika laiha, ida ne’e la merese Timor nia oan”, nia levanta liuhusi reuniaun plenária Parlamentu Nasionál (PN), segunda ne’e.
Deputada CNRT, Cedelízia Farria dos Santos, sekunda ho ID falsa sira ne’ebé uza linguajen la edukativu laiha morál hodi asalta ita-nia líder sira.
“Ha’u nia pergunta mak ne’e, ita-nia SEKOMS nia serbisu halo saida ba la kontrola mós buat sira hanesan ne’e, ita respeita liberdade imprensa, maibé ho atuasaun sira ne’e ita preokupa. Polísia Sientífika Investigasaun Kriminál bele halo ita-boot sira-nia serbisu”, nia tenik,
Membru husi órgaun lejislativu ne’e, husu Governu liuhusi Ministériu Transporte Komunikasaun (MTK) atu bele serbisu ho Komisaun A trata asuntu Justisa no Konstituisionál bele avansa lala’is lei sibernétika atu bele kontrola.
Deputadu CNRT, Patrocínio dos Reis Fernandes, husu PSIK atu tau atensaun tanba ita seidauk iha lei sibernétika, maibé ita hatene iha tinan sira liu-bá instituisaun ne’e halo hela asaun hodi deteta ID falsu sira kaer bolu hodi husu responsabilidade.
“Ohin, ita haree ID falsu sira iha mídia sosiál halo atake ida laiha edukasaun no morál hasoru Primeiru Ministru ne’e insultu ba Primeiru Ministru nu’udar kargu Estadu, aleinde nia pesoál nu’udar ema”, preokupa.
Prezidente Komisaun A ne’e, husu Ministériu Justisa (MJ), atu haree situasaun ne’e hanoin komisaun A atu avansa projetu-lei maibé iha konbinasaun atu mai proposta-lei aprezenta lalais ona ba órgaun lejislativu ne’e hodi halo diskusaun.
Vise Ministru ba asuntu Parlamentár, Adérito Hugo da Costa, rejista preokupasaun Deputadu sira-nia sei enkamina ba entidade tutela.
Notísia relevante : Governu Alerta Sidadaun Di’ak Tenke Uza Média Sosiál Ho Loloos
Jornalista : Nelson de Sousa
Editora : Rita Almeida
