DILI, 24 Fevereiru 2025 (TATOLI)—Koligasaun Partidu Kongresu Nasionál Rekonstrusaun Timorense (CNRT, sigla portugés) ho Partidu Demokrátiku (PD), kompromete lori mandatu Governu Konstituisionál dasia to’o tinan lima.
“Atu hato’o preokupasaun liga ho asuntu ne’ebé foka iha mídia kona-ba, liafuan monu ou ukun la to’o rohan, IX Governu ne’ebé kestiona husi ema barak katak sei monu ou la to’o rohan. Ha’u hakarak alerta ba públiku katak, liafuan monu sei la akontese”, Deputadu bankada Governu husi CNRT, Marcos Soares Martins, hato’o liuhusi reuniaun plenária Parlamentu Nasionál (PN), segunda ne’e.
Nia dehan, mudansa bele akontese maibé liafuan monu sei la monu tanba, Orsamentu Jerál Estadu (OJE) 2025 aprovadu no agora daudaun iha ezekusaun la’o hela liuhusi dezenvolvimentu infraestrutura bázika ne’ebé mak Governu agora hala’o. Daruak, avaliasaun Prezidente Repúblia hateten katak, Governu ida ne’e halo serbisu di’ak hela, no datoluk funsionamentu Parlamentu Nasionál daudaun la’o di’ak hela.
“Ne’ebé liafuan monu ne’e parese labele uza iha momentu ida ne’e. Daruak kona-ba liafuan la to’o rohan, serteza katak, kuandu iha mudansa signifikativu iha IX Governu serteza bele iha mudansa, maibé la’ós IX Governu ukun la to’o rohan, ne’e la signifika katak nia nota iha konotasaun negative”, nia akresenta.
Deputadu bankada CNRT ne’e hato’o ba públiku katak, IX Governu ne’ebé kompostu husi Partidu CNRT no PD kompromete koligasaun la’o durante tinan lima.
“Husu ita atu hakmatek tanba seidauk iha anúnsiu husi parte kompetente, tanba ne’e nu’udar reprezentante povu mak alerta ba ita labele preokupa ho liafuan sira ne’e”, nia apela.
Notísia relevante: Koligasaun CNRT- PD garante mandatu IX Governu Konstitusionál to’o 2028
Jornalista : Nelson de Sousa
Editor : Rita Almeida
