SEV prioritiza restu mortál iha munisípiu tolu 

DILI, 24 Fevereiru 2025 (TATOLI)-Governu liuhusi Ministériu Asuntu Kombatente Libertasaun Nasionál (MAKLN), prioritiza restu mortál iha Munisípiu Ainaru, Ermera no Manatutu mak postu Natarbora.

“Ami fó prioridade liu mak restu mortál ne’ebé barak ne’e, por-ezemplu iha Munisípiu Ainaru, Manatutu, Postu Administrativu Natarbora nian no Ermera. Iha Ainaru iha rihun-rua-resin, hanesan mós Ermera ho Natarbora. Hodi hein finalizasaun konstrusaun jardin. Ami halo ona konstrusaun kampa para depois ita bele halo funebre tinan ne’e no karik ida-ne’ebé seidauk ita sei hala’o fali iha tinan oin”, Sekretariu Estadu Veteranu (SEV), Cesar dos Santos da Silva Merak, dehan ba TATOLI iha nia knaar fatin Kaikoli, segunda ne’e.

Nia hatutan jardin eroi munisípiu hotu-hotu funsiona, polítika uluk ne’e jardin eroi ne’e iha de’it munisípiu 13 maibé agora muda polítika hodi konstrui mós iha Postu Administrativu sira.

“Tanba distansia dook hosi postu ba munisípiu entaun agora postu sira mós iha ona jardin maibé ho kritériu ida katak restu mortál tenke 100-resin”, Sekretáriu Estadu dehan.

Nune’e SEV hatete, restu mortál ne’ebé sei iha komunidade nia uma ne’e hein halibur iha ossuáriu, nune’e haloot iha jardin eroi iha kada postu administrativu no munisípiu sira.

“Ossuáriu iha munisípiu 13 estabelese hotu ona no restu mortál ne’ebé iha ami hatama hotu ona iha osouáriu sira, hodi planu tuir mai haloot iha jardin eroi sira. Maibé la’ós dala ida, ami sei halo fazeadamente. Objetivu husi estabelese osouáriu ne’e atu halibur restu mortál hafoin sei lori haloot iha jardin eroi”, dehan.

Nia hatutan: “Osouáriu ne’ebé muda mak iha munisípiu Lautein, ossuáriu iha ne’ebá estabelese desde Governu dahaat nia polítika, nia pozisaun ladún furak tanba okupa kedas estrada”.

“Tanba ne’e iha tinan kotuk ami muda ossuáriu ne’e ba fali kotuk. Pozisaun uma nia prontu ona, hein ami muda restu mortál iha ossuáriu tuan ba foun depois hein serimónia funebre”, Sekretáriu Estadu hatete.

Nia dehan restu mortál iha munisípiu hotu-hotu iha ona ossuáriu maibé iha Munisípiu Lautein, Postu Administrativu Ilomar mak sei iha restu mortál, ne’ebé mak sei iha komunidade nia uma.

“Maibé ami hein konstrusaun jardin eroi konklui ita sei haloot. Suku Kaileu iha Ilomar mak sei iha, ne’ebé prosesu konstrusaun ne’e kuandu finaliza mak ita bele haloot. Iha mahon ida-ne’ebá ne’e restu mortál kuaze atus rua, ne’e inklui mós ho iha Suku Fuat nian”, nia dehan.

Maibé asuntu ne’e sei koordena parte família sira katak haloot iha jardin eroi ka iha jardin públiku sira. Maibé simu ona informasaun katak hotu-hotu konkorda hodi haloot iha jardin eroi.

Notísia relevante: Restus Mortais 260 Haloot Ona iha Jardin Eroi Liquiça

Jornalista       : Osória Marques

Editora           : Rita Almeida