Deputadu Saul Salvador husu Governu tau-matan ba SENAI Bekora
DILI, 25 Fevereiru 2025 (TATOLI)-Deputadu bankada Governu husi Kongresu Nasionál Rekonstrusaun Timorense (CNRT, sigla portugés), Saul Salvador, husu ministériu kompetente tau atensaun ba sentru formasaun SENAI Bekora ne’ebé menus formadór no infraetrutura edifísiu.
“Semana rua liu-ba ami komisaun D vizita, rona aprezentasaun no observa sentru formasaun ne’e iha área formasaun 12. Maibé ita observa, primeiru menus formadór kada area”, levanta deputadu liuhusi reuniaun plenária Parlamentu Nasionál, tersa ne’e.
Nia dehan, formadór menus tanba formadór ezistente iha kada área iha de’it formadór na’in rua ka tolu bainhira sira moras entaun atividade formasaun labele realiza.
Kestaun seluk ne’ebé nia levanta mak fatin ne’ebé utiliza ba formasaun konstrui iha tempu Indonézia to’o agora no bainhira akontese udan boot hasoru difikuldade.
“Husu ministériu kompetente iha tinan oin aumenta orsamentu ba Sentru Formasaun SENAI Bekora hodi rezolve problema”, nia rekomenda.
Reprezentante Governu liuhusi Vise Ministru ba asuntu Parlamentár, Adérito Hugo da Costa, rejista preokupasaun ne’e no sei enkamina ba entidade relevante atu tau atensaun.
Notísia relevante:Governu sei kria task force ba konstrusaun Sentru Formasaun Exelente
Jornalista : Nelson de Sousa
Editora : Rita Almeida
