VIKEKE, 25 Fevereiru 2025 (TATOLI)—Governu liuhusi Ministériu Agrikukultór Peska, Pekuária no Floresta (MAPPF) tau ona ekipamentu pezadu ida hodi normaliza no hasai sedimentasaun ne’ebé nakonu iha kanál irrigasaun Bebui, suku Afaloikai, postu Uatulari, munisípiu Vikeke.
Notísia Relevante: Irrigasaun Bebui Uatulari nakonu ho sedimentasaun afeta ba natar ektare 1.000
“Hahú segunda (24/02) horisehik, ekipamentu pezadu eskavatór husi MAPPF tau ona iha irrigasaun Bebui. Ne’ebé, ami estensionista husi postu Uatulari mak akompaña operatór hodi suru sai ka hasai rai, rai henek no fatuk sira-ne’ebé nakonu iha kanál irrigasaun laran”, Koordenadór Estensionista postu Uatulari, Francisco Tilman Belo, hateten ba Tatoli, iha postu Uatulari, ohin.
Nia hatutan, atividade hasai sedimentasaun iha kanál irrigasaun ne’e hahú iha área aldeia Dasu-Uati nian ne’ebé limpeza husi horisehik to’o lorokraik foin mak atinje metru 300.
“Dezafiu ne’ebé ami hasoru hasai sedimentasaun iha kanál irrigasaun ne’e, iha kanál balun fatin klot, nune’e eskavatór atu suru ka hasai sedimentasaun difisil. Presiza loron lima hanesan ne’e mak limpeza hotu,” nia dehan.
Daudaun ne’e, nia dehan, limpeza uluk kanál irrigasaun ne’ebé husi área Dasu-Uati to’o aldeia Mauselok, suku Matahoi, depois hotu mak ba fali kanál irrigasaun nia hun iha mota Bebui.
“Ami agora limpeza tuit kanál, irrigasaun ninia hun iha mota Bebeui ne’e seidauk hasai sedimentasaun tanba ita hamoos uluk iha ne’ebá, entaun ema bele loke ona bee. Entaun kanál sira-ne’e ita limpeza labele. Tan ne’e mak ami limpeza hasa’i uluk sedimentasaun iha kanál sira husi área Dasu-Uatu nian to’o Mauseluk, hotu mak ami ba limpeza iha irrigasaun hun. Ne’e, ita bele loke ona bee, agrikultór sira bele hala’i natar ba epoka dauluk nian,” nia hateten.
Aleinde ne’e, nia husu agrikultór sira liuliu natar-na’in sira iha Uatulari, ajuda apoiu servisu limpeza ka hasai sedimentasaun tanba fatin sira-ne’ebé eskavatór labele suru sai, presiza ema hodi ajuda suru sai.
“Tanba ami estensionista ho operatór de’it, horisehik servisu, ne’ebé ha’u husu ba natar-na’in sira tenke ajuda hodi hasa’i sedimentasaun sira, labele ami mesak mak serbisu natar nain sira tuur nonok de’it. Ita presiza apoiu malu servisu atu semana ida-ne’e bele finaliza limpeza sedimentasaun sira-ne’ebé iha kanáll irrigasaun laran,” nia dehan.
Tuir dadus, natar pertense ba irrigasaun tékniku Bebeui hamutuk ektare 1000 ne’ebé benifisia ba populasaun postu Uatulari.
Jornista : Vitorino Lopes da Costa
Editór : Cancio Ximenes
