VIKEKE, 25 Fevereiru 2025 (TATOLI)—Diretór Servisu Ministériu Agrikultura, Pekuária, Peska no Floresta (SMAPPF) munisípiu Vikeke, Olivio Freitas Soares, hateten daudaun ne’e SMAPPF Vikeke prepara fini hare varidade hare-mean hamutuk tonelada 12 hodi distribui ba agrikultór sira husi postu administrativu lima (5).
“Ba époka tinan ida-ne’e ami prepara ona haree fini hamutuk tonelada hamutuk 12 ne’ebé sei rai iha sentru Ratahau, atu distribui ba ita-nia agrikultór sira husi postu lima hodi kuda iha natar,” Diretór SMAPPF Vikeke ne’e hateten ba jornalista sira, iha postu Vikeke Vila, ohin.
Daudaun ne’e, servisu MAPPF Vikeke seidauk distribui fini hare ba agrikultór sira tanba agora agrikultór sira foin kanaliza bee ba natar, bainhira kanaliza bee hotu, hafoin distribui ba agrikultór sira iha postu sira.
“Fini hare ne’ebé ita iha, agora seidauk bele distribui tanba daudaun ne’e ita-nia agrikultór sira sei kanaliza bee ba natar. Bainhira kanaliza bee hotu, mak ami foin distribui ba postu sira. Maibé ami sei haree poténsia natar sira-ne’ebé postu barak ami sei fahe tuir ida-ne’e,” nia dehan.
Kona-ba fini hare, nia dehan, iha munisípiu Vikeke natar Hae-Oli, postu Uatucarbau ne’ebé abandonadu durante tinan 11, agora agrikultór sira komesa halai natar ida-ne’e mak distribui kilograma 400.
“Natar Hae-Oli de’it mak ami distribui ona, maibé ba natar sira seluk, ami seidauk distribui. Nune’e fini hare sira-ne’e ami preserva hela iha sentru Agrikula Ratahu,” nia hateten.
Jornalista : Vitorino Lopes da Costa
Editór : Cancio Ximenes
