VIKEKE, 26 Fevereiru 2025 (TATOLI)—Diresaun Nasionál Transporte Terestre (DNTT) nasionál hamutuk ho Polísia Nasionál Timor Leste (PNTL), kuarta ne’e, sensibiliza sinál tránzitu ba motorista, funsionáriu no estudante sekundáriu sira iha munisípiu Vikeke.
Diretór Diresaun Nasionál Transporte Terestre (DNTT), Maria Antónia, hateten DNTT no PNTL sensiviliza sinál tránzitu nian ba abitante sira oinsá uza estrada públiku sira ho seguru no kumprimenta regra tránzitu sira iha estrada públiku.
“Tanba ne’e, ami instrodús sinál tránzitu nian ba ita-nia funsionáriu, motorista no estudante sira, dala ruma sira uza transporte akontese beibeik asidente tráfiku. Maske sira iha karta kondusaun mós sei hetan asidente nomós ami simu relatóriu husi tranzitu katak ita-nia motorista sira-ne’ebé utiliza estrada públiku nafatin kontra sinál tránzitu nian,” Maria Antónia hateten ba jornalista sira, iha salaun servisu edukasaun Vikeke, Beloi, ohin.
Nia dehan, DNTT no PNTL esplika kle’an liu kona-ba respeita sinál tránzitu ba abitante sira kona-ba uza estrada públiku, tanba sinál sira-ne’e mak sai matadalan ba ema bainhira uza estrada públiku.
“Ita tenke respeita sinál tránzitu tanba asidente tráfiku akontese bainhira de’it, iha ne’ebé de’it no ba sé de’it. Nune’e, bainhira halo movimentu tau atensaun mós ba sinál sira-ne’ebé iha estrada públiku sira,” nia hateten.
Iha fatin hanesan. Segundu Komandante PNTL munisípiu Vikeke, Inspetur Xefe Polísia Domingos Gomes, hateten programa sensibilizasaun ba sinál tránzitu ne’e sai importante ba komunidade utilizadór transporte motorizada no karreta sira hodi hasa’e sira-nia koñesementu.
“Tan ne’e, DNTT no PNTL servisu hamutuk hodi realiza atividade ida-ne’e no unidade tránzitu iha Vikeke dala barak halo pasa revista no sensibiliza sinál tránzitu nian ba ita-nia komunidade. Atu nune’e, ita-nia komunidade bele komprende uza transporte no asegura aan ba asidente tráfiku sira,” nia dehan.
Reprezentante estudante sekundáriu 04 Setembru Vikeke, Flora Miguel Soares, sente kontente partisipa iha diseminasaun ba sinál tránzitu nian tanba dala barak utiliza motorizada maibé la komprende sinál tránzitu nian.
“Entaun, liuhusi sensibilizasaun ida-ne’e ami bele komprende regra tránzitu nian no sinál sira-ne’ebé hatuur ka harii iha Estrada públiku. Nune’e, ami lori motorizada tuir regra sira-ne’ebé ohin PNTL bo DNTT sira fahe ba ami,” nia hateten.
Programa sensibilizasaun ne’e, partisipa husi funsionáriu munisípiu Vikeke, kondutór sira husi postu administrative lima no estudante sekundáriu sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
