KOVALIMA , 26 fevereiru 2025 (TATOLI)- Empreza Lifran Unipesoál Lda, finaliza ona reabilitasaun ba edifísiu eis-Sekretaris Wilayah Daerah (Sekwilda) II, iha resintu Administrasaun Munisípiu Kovalima (AMK).
Diretór servisu munisipál planeamentu integradu no dezenvolvimentu (SMPID), Carlito Barros dos Reis informa katak Autoridade munisípiu Kovalima reabilita edifísiu antigu Sekwilda II ne’e uza orsamentu restu husi implementasaun projetu ualu husi 2024.
“Ita uza orsamentu restu husi implementa projetu PDIM ualu husi 2024 ne’e, hodi reabilita edifísiu iha Administrasaun Munisípiu Kovalima nia sorin ba funsionáriu sira no mós hadi’a lampu iluminasaun iha edifísiu AMC no fatin estasionamnetu motorizada no karreta ba funsionáriu ne’ebe presta servisu iha AMK”, Carlito Barros dos Reis, relata ba jornalista sira, iha resintu AMC, ohin.
Dirijente ne’e dehan, daudaun-ne’e empreza Lifran finaliza ona no Prezidente Autoridade Kovalima (PAM) mós iha ona hanoin katak reabilitasaun edifísiu ne’e sei inaugura husi Prezidente Repúblika (PR), José Ramos-Horta.
Prosesu reabilitasaun ne’e, nia dehan, empreza Lifran halo reabilitasaun no halo de’it instalasaun ár kondisionadu maibé empreza la halo akizisaun mobiliáriu sira hanesan meza, kadeira no armáriu.
“Ami fó empreza durante fulan rua atu reabilita edifísiu empreza konsege finaliza ona reabilitasaun maibé daudaun ne’e kompleta de’it ona hodi halo manutensaun ki’ik sira”, nia informa.
Orsamentu restu husi implementasaun projetu ualu hamutuk rihun 151-resin ne’ebé autoridade Kovalima uza osan restu alende reabilita edifísiu iha resintu AMC, hadi’a ilumunisaun iha edifísiu AMC oin no mós fatin estasionamentu motorizada no karreta ba funsionáriu sira.
Lembra katak empreza hahú tanba durasaun kontratu ba reabilitasaun durante fulan rua ne’ebé hahú reabilita novembru remata iha dezembru 2024 ne’ebé daudaun ne’e empreza finaliza ona reabilitasaun.
Alokasaun orsamentu ba projetu ualu husi PDIM ne’ebé implementa iha 2024 ne’e hamutuk milliaun $ 1.3, husi montante ne’e $ 1.2 kontrata ona empreza sira hodi halo ona konstrusaun projetu konstrusaun ne’ebé empreza sira hahú serbisu iha agustu 2024 ne’ebe finaliza ona hein halo inaugurasaun.
Jornalista:Celestina Teles
Editór: Rafael Ximenes de A Belo
