DILI, 26 Fevereiru 2025 (TATOLI) – Konsellu Ministru aprova oferta inisiál akordu ekonómiku Asosiasaun Nasaun Sudeste Aziátiku (ASEAN, sigla inglés) nian ida ho naran ASEAN Framework Agreement on Services kona-ba halo atividade komérsiu setór servisu nian.
Vise-Ministra ba Asuntu ASEAN, Milena Rangel, esplika katak Konsellu-Ministru delibera hodi autoriza proposta kompleta iha área servisu komérsiu no movimentu pesoa naturál, ne’ebé sei submete nu’udar proposta inisiál husi Timor-Leste ba Sekretariadu ASEAN no Estadu-Membru sira ASEAN nian.
“Ohin ita-nia oferta inisiál Konsellu Ministru aprova atu fó dalan ba tekniku sira bá halo negosiasaun. Ita-nia oferta asesu ba merkadu nian hahú aprova ona halo kedas komunikasaun ba Sekretariadu Asosiasaun Nasaun Sudeste Aziátiku nian nomós komunika filafali ba Estadu-Membru Asosiasaun Nasaun Sudeste Aziátiku nian, nune’e bele iha negosiasaun bilaterál ho Estadu-Membru ho Timor-Leste”, Milena Rangel hateten iha Palásiu Governu, ohin.
Nia esplika katak proposta hirak-ne’e halo parte iha prosesu negosiasaun ba adezaun Timor-Leste ba akordu ASEAN nian kona-ba Servisu Komérsiu (ASEAN Trade in Services Agreement-ATISA) no Akordu Movimentu Pesoa Naturál ASEAN (ASEAN Movement of Natural Persons Agreement -MNP), iha ámbitu negosiasaun ba adezaun plena Timor-Leste nian iha ASEAN.
“Akordu ekonómiku prinsipál ida ne’e importante tebes bele asegura ita-nia adezaun, tanba ita hotu akompaña iha Dezembru tinan kotuk aprova ita-nia inísiu oferta ida ba bens no serbisu. Fulan oin mai tan ita sei ko’alia tan ba investimentu nian”, nia adianta.
Notísia relevante: Governu aprova proposta adezaun ba akordu kuadru ASEAN
Jornalista: Arminda Fonseca
Editora: Maria Auxiliadora
