DILI, 26 Fevereiru (TATOLI) – Timor-Leste kontribui voluntariamente $155.810 ba Fundu Espesiál Komunidade País Língua Portugeza (CPLP, sigla portugés), ne’ebé aloka ba finansiamentu projetu “Luzofonia iha Timor-Leste”.
“Husi rezolusaun Governu nian ita mós husu atu fó kontribuisaun voluntáriu ba hanesan nasaun membru CPLP. Ita husu Timor-Leste apoiu finasiamentu ba iha projetu Luzofonia $155.810 atu apoia atividade jornalizmu nian la’o hamutuk ho DiliGente atu publika notisia jornál iha língua portugeza”, Vise-Ministra ba Asuntu ASEAN, Milena Rangel hateten iha Palásiu Governu, ohin.
Nia salienta katak projetu ida-ne’e dezenvolve iha ámbitu CPLP nian, ho objetivu atu promove no divulga língua portugeza iha Timor-Leste husi jornál diáriu online DiliGente, meiu komunikasaun sosiál úniku nasionál ne’ebé fó sai de’it iha língua portugeza.
Nia esplika razaun hili mídia DiliGente ba divulga língua portugeza iha Timor-Leste, tanba sira hetan ona formasaun husi país membru CPLP.
“Daudaun ita hahú ho sira pois bá oin bele abranje tan ho [mídia] sira seluk. Ita mós [halo] parseria ho Fundasaun Oriente, Mackenzie Presbyterian University Brazil. Projetu ne’e Timor-Leste mak finansia, maibé halo iha kontestu CPLP”, konklui.
Jornalista: Arminda Fonseca
Editora: Maria Auxiliadora
