DILI, 26 Fevereiru 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, hateten Komandu F-FDTL sei haruka membru na’in-20 bá Xina hodi eskola kona-ba médiku.
“Médiku militár agora ita iha faze formasaun. Ita agora iha médiku espesialidade ida mak iha Kuba. Ita atu haruka ema na’in-20 bá tan Xina. Ita-nia balun mós bá tan país kooperante sira hanesan Indonézia no nasaun sira seluk,” Falur hateten ba jornalista sira iha Kuartél Jenerál F-FDTL, Fatuhada, Dili, kuarta ne’e.
Nia dehan, Komandu F-FDTL la’ós foku hodi investe ba médiku maibé mós ba infermeiru sira, farmasista sira inklui espesializada ba laboratóriu nian.
Notísia relevante: Governu Xina aprova ona konstrusaun ospitál militár andár ualu
“Ita prepara rekursu sira bainhira ita instala ospitál militár, bá-oin ita prenxe de’it rekursu sira ne’e bá estrutura de’it,” nia tenik.
Falur esplika katak ospitál militár ne’e sei fó asisténsia ba militár, polísia, veteranu no ema sivíl maibé depende ba desizaun polítika sira.
Falur afirma, kona-ba rai atu harii ospitál militár ne’e, Ministru Defeza, Donaciano Costa Gomes “Pedro Klamar Fuik” liberta ona rai iha Kuartél Jenerál F-FDTL nian kotuk, Fatuhada, sai fatin ba futuru instalasaun ospitál militár.
Entretantu, hafoin reuniaun tripartida entre Embaixada Xina, Komandu Jerál Polísia Nasionál Timor-Leste (PNTL) no Asosiasaun Emprezária Xina iha Timor-Leste ba daruak, tersa (25/2/2025), Embaixadora Xina ba Timor-Leste, Wang Wenli hateten Govenu Xina aprova ona akordu kooperasaun entre Governu Timor-Leste ho Governu Xina atu harii ospital militár andár ualu iha Timor.
Jornalista: Natalino Costa
Editór: Xisto Freitas da Piedade
