PENANG, 26 fevereiru 2025 (TATOLI)— Malázia ne’ebé hanesan Prezidente ba ASEAN (Associação das Nações do Sudeste Asiático) iha tinan 2025 kompremete hodi lori Timor-Leste nia adezaun hodi sai membru permenente ba ASEAN.
Asuntu ne’e rasik relata direta husi Ministru Defeza Malazia, Dato’ Seri Mohamed Khaled Bin Nordin bainhira halao enkontru ho Ministru Defeza Timor-Leste, Donaciano Costa Gomes ‘Pedro Klamar Fuik’ iha sesaun Reuniaun Ministru Defeza ASEAN nian (ADMM -sigla inglês) ba tinan 2025 Iha Otél Shangri-La Rasa Sayang, Batu Ferringhi Penang Malázia, kuarta (26/02/2025).
Parte seluk, Ministru Defeza Timor-Leste, Donaciano Costa Gomes ‘Pedro Klamar Fuik’ hateten Timor-Leste sente onradu bele hetan oportunidade hodi halao enkontru bilateral ne’ebé fo rezultadu positivu sira konaba adezaun TL ba ASEAN.
“Wainhira ha’u to’o ha’u hetan enkontru Bilateral ho Ministru Defeza Malazia nian, ne’ebé mak fo sira nia apoiu tomak iha sira nia prezidensia ne’e no sira halo esforsu hotu kompremete, halo esforsu hotu atu TL tama iha ASEAN iha sira nia mandatu,” dehan Ministri Donaciano iha Otél Shangri-La Rasa Sayang, Batu Ferringhi Penang Malázia, kuarta ne’e.
Pedro Klamar Fuik iha loron 26 febreiru 2026, iha otél hanesan mós enkontru bilateral ho Ministru Defeza Laos PDR, Khamlieng Outhakaisone hanesan nasaun membru ASEAN ne’ebé fo komprimisu atu nafatin apoiu TL no hasae servisu koperasaun iha setor seguransa no defeza.
“No ikus liu mak ho Ministru Defeza nasaun Laos. Nia mos iha pozisaun hanesan no sira apoiu totalmente TL nia adezaun ba ASEAN para alende enkontru bilaterais,” esplika nia.
Enkontru bilaterál ne’ebé akompaña mos husi Diretór Jerál Diresaun Jerál Polítika Defeza Nasionál Ministériu Defeza, Nuno Carvalho dos Santos ne’e mos hanesan pasu importante ida hodi hametin relasaun defeza entre nasaun rua ne’e.
Aleinde diskute kestaun sira relasiona ho kooperasaun defeza nian, konkorda atu kontinua hametin diálogu no apoiu iha forum rejionál oioin, inklui ASEAN no plataforma sira seluk ne’ebé foka liu ba kestaun seguransa.
Molok remata sorumutu ne’e, Ministru Defeza, Donaciano Gomes mós entrega prendas ba sira hanesan Tais no Kafe hanesan produtu lokal ida husi Letefoho, Munisípiu Ermera no konvida direta nia omologu hodi partisipa iha selebrasaun loron FALINTIL iha 20 agustu 2025.
Membru Governu ne’e informa aliende ne’e halo mós enkontru transversais ho Ministru Defeza husi nasaun seluk hanesan Tailandia, Singapura, Filipina, Kamboja no iha sira nia intervensaun formal mós manifesta sira nia apoiu ba Timor-Leste adere ba ASEAN.
Jornalista : Cidalia Fátima
Editora : Armandina Moniz
