PENANG, 26 fevereiru 2025 (TATOLI)– Ministru Defeza Repúblika Indonézia, Sjafrie Sjamsoedin no Ministru Defeza Repúblika Demokrátika Timor-Leste, Donaciano Costa Gomes ‘Pedro Klamar Fuik’ destaka kooperasaun militár ba hakbiit forsa defeza.
Ida-ne’e konfirma iha enkontru bilaterál ne’ebé akontese iha loron 26 fulan-Fevereiru tinan 2025 iha sesaun Retiru hosi Enkontru Ministru Defeza ASEAN nian (ADMM – Inglés) iha Otél Shangri-La Rasa, Penang, Malázia.
Ministru Donaciano hato’o agradesimentu ba apoiu husi Governu Indonézia liuhosi Ministru Sjafrie hodi avansa kooperasaun no tulun prosesu adezaun ba ASEAN.
“Nune’e mos hau iha fali enkontru ho Ministru Defeza Indonezia nian, Sjafrie no ami kolia konaba kooperasaun, politika eksterna no komprimisiu ne’ebé rai rua halo, atu hare’e ba futuru no nune’e mos Indonezia komprete atu apoiu totalmente adezaun Timor-Leste nian ba ASEAN,” esplika Ministru Donaciano iha entrevista ho jornalista, kuarta ne’e.
Nia dehan, Indonesia ho Timor-Leste hanesan nasaun rua ne’ebe belun besik, no hare ba buat hotu ne’ebe akontese iha pasadu, ne’e hanesan lisaun ida ba mundu katak nasaun rua ne’e iha nivel humanismu ne’ebe a’as husi povu to’o lideransa sira.
Pedro Klamar Fuik mós fó hanoin kona-ba saida mak durante ne’e líder nasaun rua ne’e tenta atu halo, katak ema tenke liga no harii dame, la’ós retórika de’it.
“Kooperasaun entre Timor-Leste ho Indonézia sai ezemplu ba ema hotu haree husi aspetu hotu-hotu hafoin Timor-Leste ukun an no Indonézia hakuak no promove Timor-Leste hodi bele sai membru ASEAN, no ne’e mak ita-nia kompromisu atu ajuda no haburas pás mundiál”, tenik nia.
Nia mós hato’o agradesimentu ba vontade Indonézia nian hodi simu kandidatu na’in haat husi Timor-Leste hodi estuda iha Institutu Reziliénsia Nasionál (Lemhannas) no konvida Ministru Defeza Sjafrie atu tuir Loron Aniversariu FALINTIL nian iha loron 20 Agostu 2025.
Ministru Defeza Repúblika Indonézia, Sjafrie Sjamsoedin, iha enkontru ne’e hato’o bemvindu ba kadetes sira husi Timor-Leste ne’ebé estuda iha Lemhannas no sei fó tan edukasaun ba joven soldadu sira.
“Ami sei fó oportunidade edukasaun ba soldadu Timor-Leste no ha’u dala ida halo inspesaun iha Akademia Militár no haree Bandera Timor-Leste no ne’e mak sai hanesan motivasaun ba jerasaun foun sira atu estuda hamutuk ho maluk Indonézia sira”, tenik Ministru Defeza Sjafrie iha enkontru ne’e.
Ministru Defeza Sjafrie mós husu atu halo renovasaun iha Semitériu Herois Indonézia (TMP) iha Timor-Leste no konvida Ministru Defeza Donaciano atu vizita Indonézia.
Antes taka enkontru ne’e, Ministru Defeza na’in rua ne’e husu ba delegasaun hotu-hotu atu sai husi sala no halo diskusaun privadu durante minutu rua no remata enkontru ne’e sira fó lembransa ba malu, Timor-Leste rasik fó Tais no Kafé Letefoho husi munisípiu Ermera.
Jornalista : Cidalia Fatima
Editora : Armandina Moniz
