VIKEKE, 26 Fevereiru 2025 (TATOLI)—Komandu Polísia Nasionál Timor Leste (PNTL) husi nasionál, kuarta ne’e, sensibiliza planu implementasaun piskososiál ba Ofisiál Polisiamentu Suku (OPS) no autoridade lokál sira iha munisípiu Vikeke.
Reprezentante Komisáriu PNTL atuál komandante Polísiamentu Komunitária Nasionál, superintendente Ismael da Costa Babo, hateten objetivu husi sensibilizasaun ne’e atu polisiamentu komunitária suku no autoridade lokál sira bele redús problema sira mosu iha baze.
“Husi atividade sira-ne’e, ita fó hanoin ba malu oinsá reziliénsia hasoru ameasa sira iha moris loro-loron, hodi proteje ita-nia rain ida-ne’e. Fó hanoin atu hasees aan husi krime sira hodi promove dezenvolvimentu nasionál,” Ismael da Costa Babo hateten ba jornalista sira, iha salaun Tilou, postu Vikeke Vila, ohin.
Nia husu ba komandante sira iha Vikeke atu kontinua partilla informasaun sira-ne’e ba sosiadade sira liuliu ba protesaun kriminál, protesaun natureza, protesaun ba feto vulneravel sira no regra tránzitu nian.
“Ha’u husu OPS sira tenke sai matadalan ba ita-nia povu sira iha baze. Tan psikososiál ne’e relevante ba ita-nia servisu. Ohin, ita rona tenke kontinua fó hanoin ba malu, atu servisu sai profisionál, servisu ho efisiensia no efikasia,” nia dehan,
Komandante PNTL munisípiu Vikeke, Antonio Rego Fernandes, hato’o agradesimentu ba Komandu PNTL liuhusi Diresaun Polisiamentu Komunitária realiza sensibilizasaun ba implementasaun psikososial, tanba ne’e sai importante ba membru PNTL no autoridade lokál sira.
“Tanba psikososiál ne’e ko’alia liu ba ita-nia hanoin, hahalok no mentalidade. Husi parte tolu ne’e sai importante ba ita. Tanba ne’e, ami PNTL labaruk ko’alia hakarak elemina kazu krime sira liuliu iha munisípiu Vikeke, maibé ida-ne’e imposivel ba ita hodi elemina kazu krime, ita redús númeru kazu krime. Tan ne’e, ita hotu hamutuk redús kazu krime sira,” nia hateten.
Iha biban ne’e, xefe suku Maluru, postu Vikeke Vila, munisípiu Vikeke, Bendito Soares, hato’o agradesimentu ba PNTL ne’ebé sensibilizia implementasaun psikososiál ba autoridade sira iha Vikeke tanba matéria sira-ne’e sai importante.
“Sensibilizasaun ba psikososiál ne’e importante ba ami, atu ami bele hatutan ba ita-nia komunidade hodi muda hahalok krime sira-ne’ebé akontese iha suku. Liuhusi oportunidade ida-ne’e, ami husu PNTL se bele atividade sensibilizasaun sira-ne’e bele la’o to’o suku atu ita-nia komunidade bele komprende,” nia dehan.
Partisipa iha atividade sensibilizasaun ne’e kona-ba implementasaun psikososiál ne’e hetan partisipa husi autoridade lokál, funsionáriu públiku no estudante sira.
Jornalista : Vitorino Lopes da Costa
Editór : Cancio Ximenes
