Rúsia hato’o prontidaun apoia formasaun rekursu umanu ba F-FDTL
DILI, 26 Fevereiru 2025 (TATOLI)—Xefe Estadu Maiór Jenerál FALINTIL-Forsa-Defeza Timor-Leste (F-FDTL), Tenente Jenerál Domingos Raul “Falur Rate Laek”, hateten foin daudaun, 19 Fevereiru liubá, nia simu vizita kortezia ida husi Embaixadór Naun-Rezidente Rúsia, Sergei Gennadievich Tolchenov ho delegasaun iha Kuartél Jenerál F-FDTL hodi diskute formasaun ba forsa armada.
Iha soru-mutu ne’e, Falur haktuir, Rúsia prontidaun apoia formasaun rekursu umanu ba membru F-FDTL, nune’e bele profisionaliza liután forsa armada referida bainhira hala’o kna’ar iha loron-loron.
“Sira hato’o sira-nia prontidaun hodi fó formasaun ba ita-nia rekursu umanu sira. Soké, tenke atualiza filafali kooperasaun sira-ne’ebé mak uluk sira halo ona ho ita-nia Governu, nune’e ita bele kontinua,” nia informa iha kna’ar fatin, kuarta ne’e.
Falur Rate Laek prefere formasaun ne’e foka bá área espesiál sira nune’e bele eleva liután koñesimentu membru F-FDTL.
Embaixadór Gennadievich Tolchenov husu ba Komandu F-FDTL atu autoriza sira-nia militár atubele vizita Timor-Leste hanesan Japaun, Indonézia, Amérika, Austrália, Inglaterra no Fransa ne’ebé vizita ona Timor-Leste.
Rekorda fali katak Embaixadór Naun-Rezidente, Russia Sergei Gennadievich Tolchenov iha loron 19 fulan- Fevereiru 2025 dadeer, hato’o karta kredensiál ba Prezidente Repúblika, José Ramos Horta , iha Palásiu Prezidensiál.
Hafoin entrega karta kredensiál ba Xefe Estadu José Ramos Horta, embaixadór ne’e dezloka kedas hodi hasoru-malu ho Xefe Estadu Maiór Jenerál F-FDTL, Falur Rate Laek, iha tuku 14:00 Otl.
Jornalista: Natalino Costa
Editór: Xisto Freitas da Piedade
