KOVALIMA, 26 fevereiru 2025 (TATOLI)- Projetu Planu Dezenvolvimentu Integradu Munisipál (PDIM), 2025 nian iha munisípiu Kovalima atu tama ona iha faze konkursu públiku ne’ebé implementa iha Postu administrativu Fohorem, Fatumea no Zumalai iha Kovalima.
“Iha 2025 ne’e ita-nia projetu PDIM tolu ne’ebé foku ba setór saúde mak iha projetu rua no setór agrikultura iha projetu ida, ne’ebé daudaun ne’e atu tama ona iha faze konkursu públiku”, Diretór PDIM, Carlito dos Reis Barros relata ba jornalista sira, iha resintu AMC, ohin.
Projetu PDIM tolu ne’e sei konstrui sentru saúde iha Postu administrativu Fatumea, konstrui rezidénsia ba médiku sira, iha postu Fohorem, suku Datolu no haree ba setór saúde konstrui irrigasaun iha Zumalai.
Dirijente ne’e dehan, kona-ba prosesu atu halo implementasaun faze iha prosesu dokumentu pré-kualifikasaun no vizita ba fatin (site visit) mós finaliza ona no marsu loke konkursu públiku nune’e empreza sira atu konkorre iha sosa dokumentu.
Orsamentu Jerál Estadu (OJE), 2025 aloka ba SMPID hamutuk rihun-8,476 inklui ho retensaun 10% husi projetu PDIM ualu ne’ebé implementa iha 2024 ho reapropriasaun postu saude Nainare. Verba ba implementasaun projetu tolu ne’e hamutuk rihun-600.
Fó hanoin fali katak orsamentu 2025 ne’ebé Governu sentrál koloka mai iha munisípiu Kovalima $ 8,293,634 ne’ebé hodi fahe ba kategória sira hanesan Saláriu no vensimentu, Bens no servisu, Transferénsia públika, Kapitál menór no Kapitál dezenvolvimentu.
Orsamentu 2025 hamutuk $ 8,293,634 hodi fahe ba kategória saláriu no vensimentu $ 2,695,872, Bens no Servisu $ 8,351.30, Transferénsia Públika $ 3,765.758, Kapital menór $ 150.000 no Kapitál dezenvolvimentu $ 8,468.74.
OJE 2025 ne’e, autoridade Kovalima fó prióridade ba setór agrikultura tanba atu minimiza importasaun no hasa’e produsaun hare iha rai laran presiza kria kondisaun hodi identifika mapamentu área potensiál; atu hasa’e produsaun hare iha Suku Raimea postu Zumalai, Suku Beco no Suai Loro husi Postu administrativu Suai no sira seluk, maibé presiza hadi’a irrigasaun.
Jornalista:Celestina Teles
Editór: Rafael Ximenes de A. Belo
