VIKEKE, 27 Fevereiru 2025 (TATOLI)-Diretór Diresaun Transporte Terestre munisípiu Vikeke, Saul Henrique, informa, DNTT munisípiu Vikeke identifika tinta pinta pasadrera ka “zebra cros” iha kapaitál laran barak mak moos (mohu) hotu ona, entuan difikulta ema la’o ain ultrapasa ba Estrada sorin.
“Kona-ba pasadera ka zebra cross iha Vikeke laran, ami halo ona identifikasaun, ami haree tinta mutin pinta pasadera sira-ne’e barak mós ona, difikulta ba ita ema sira la’o ain liuliu ba estudante sira korta dalan tama eskola. Zebra cross ne’e sia (9) importante ba ema, bainhira ema korta dalan liu iha zebra cross leten, motorista sira para ona, depois ema liu tiha mak foin karreta no motorizada sira halai. Maibé agora maioria moos ona,” Saul Henrique hateten ba jornalista sira, iha postu Vikeke Vila, ohin.
Nia hatutan, DNTT Vikeke halo on apedidu iha tinan kotuk maibé to’o ohin loron seidauk iha resposta, nune’e ba tinan 2025 ne’e sei kontinua halo pedidu ba nasionál atu tau atensaun ba zebra cross sira-ne’e pinta fila-fali.
“Preokupasaun zebra cross ne’e iha tinan kotuk ha’u hato’o ona pedidu ba nasionál, maibé seidauk fó resposta. Ne’ebé, ba tinan ida-ne’e ami sei halo fila-fali pedidu foun ba nasionál hodi haree ba asuntu zebra cross sira-ne’ebé ami identifika tinta moos hotu ona,” nia dehan,
Zebra cross ne’ebé identifikadu mak hanesan iha Ensinu Báziku Sentral (EBC, sigla portugés) 01 nia oin ne’e kuaze lakon ona, entaun bele prejudika ba estudante sira-nia movimentu ba-mai hodi ultrapasa pasadera ne’e.
Zebra Cross iha administrasaun munisipiu ninia oin ne’e mós kuaze moos ona, nune’e mós parte Igreja Conceição Imaculda Vikeke Vila, edifísiu Sekretariadu Tékniku Administrasaun Eleitoral (STAE), Loja Esperansa Boromatan, Loja LM Beloi, Klínika Madre Beloi, Rejistu Notariadu no edifísiu Servisu Edukasaun Munisípiu Vikeke nia oin ne’e, tinta zebra cross soira-ne’e kuaze lakon hotu ona.
Iha fatin hanesan, DNTT nasionál, Maria Antonia, haktuir kona-ba zebra croas ne’ebé iha Vikeke pinta moos, DNTT Vikeke halo pedidu ba nasionál atu haree asuntu sira-ne’e tanba ne’e importante ba komunidade.
“Kona-ba zebra cross ne’ebé tinta moos ne’e diretór DNTT Vikeke tenke halo pedidu ba nasionál hodi haree tau orsamentu ba tinan oin. Aleinde ne’e, ami mós hakarak relata ba públiku katak iha tinan hirak liu ba tékniku DNTT nasionál mai monta hotu sinál tránzitu iha estrada públiku sira. Maibé, ohin, ami haree fali, sinál sira-ne’e kuaze lakon hotu, ema mak estraga. Loloos ne’e, ita tenke kuida tanba sinál ne’e mak guia ita hodi la’o tuir,” nia hateten.
Tan ne’e, nia husu abitante munisípiu Vikeke bainhira hetan sinál tranzitu sira harii iha dalan públika mak monu karik, entrega ba DNTT hodi harii fila-fali.
Jornalista : Vitorino Lopes Costa
Editór : Cancio Ximenes
