DILI, 27 Fevereiru 2025 (TATOLI)—Komisaun F Parlamentu Nasionál ne’ebé trata asuntu seguransa, sosiál no igualdade jéneru, hala’o fiskalizasaun ba Diresaun Nasionál Farmásia Produtu Medikamentu (DNFPM) hodi haree ai-moruk ne’ebé mak sai preokupasaun públiku.
“Objetivu husi Komisaun F mai halo fiskalizasaun iha Diresaun Nasionál Farmásia no Produtu Médikamentu, atu haree servisu liuliu liga ho ai-moruk no mós pedidu sira husi sentru saúde no postu saúde sira kona-ba preokupasaun estoke out ai-moruk,” Vise Prezidente Komisaun F, Luís Ximenes Caldeira informa ba jornalista sira iha salaun DNFPM, Lahane, kinta ne’e.
Nia afirma, iha fasilidade saúde DNFPM enfrenta problema menus ai-moruk sira, tanba burokrasia ne’ebé mak naruk loos.
“DNFPM nia servisu atu fornese atendimentu liuliu liga ho pedidu ai-moruk mai iha Diresaun Nasionál Farmásia no Médikamentu, nune’e bele fornese ai-moruk atende pedidu sira-ne’e hodi responde ba estoke out ai-moruk iha baze,” nia haktuir.
Kona-ba difikuldade seluk iha Diresaun Nasionál Farmásia Produtu no Médikamentu, Luís dehan, mak menus rekursu umanu no transporte.
“Sira-nia pedidu halo beibeik maibé seidauk hetan resposta, entaun ita fó hanoin ona ba sira atu halo pedidu depois mak ita reforsa liuhusi relatóriu no mós liuhusi audiénsia,” nia afirma.
Iha fatin hanesan, Diretór Nasionál Farmásia Produtu no Médikamentu, Delfim Ferreira, agradese ba Komisaun F iha Parlamentu Nasionál ne’ebé bele mai ona to’o iha diresaun referida hodi halo fiskalizasaun nune’e fanun DNFPM bele halo servisu di’ak liután.
“Ami mós aprezenta progresu servisu nian durante ne’e. Ikus mak ami mós aprezenta ami-nia difikuldade balun hanesan rekursu umanu, liuliu pesoál tékniku sira na’in-10 no mós transporte iha ida de’it, tanba ne’e ami husu atu apoiu hodi aumenta tan rekursu umanu no transporte,” Delfim Ferreira esplika.
Nia hatutan, bá-oin DNFPM hakarak reforsa monitorizasaun no supervizaun ba iha fasilidade sira, nune’e servisu sira bele la’o ho di’ak husi munisípiu to’o nasionál.
Jornalista: Felicidade Ximenes
Editór: Xisto Freitas da Piedade
