DILI, 27 Fevereiru 2025 (TATOLI)-Ministru Ensinu Superiór Siénsia no Kultura (MESSK) José Honório Guterres prefere, Universidade da Paz (UNPAZ), Dili Institute of Technology (DIT), no ensinu superiór seluk kompleta rekezitu molok loke kursu doutoramentu.
Ministru José Honório hateten, DIT ho UNPAZ hatama proposta dalarua ona maibé seidauk bele hetan lisensa atu loke kursu doutoramentu.
“Ita konvida avalidór internasionál sira mai no sira halo avaliasaun ba dokumentu ne’ebé iha, enfelizmente sira-nia kursu sira-ne’e la-liu no sira labele loke doutoramentu tanba dokumentu sira ne’ebé sira hato’o mai la prienxe kritériu, nune’e mós seidauk tempu para ensinu superiór sira iha Timor-Leste atu loke doutoramentu”, dehan ministru Honório iha Palásiu Governu, ohin.
Nia hatutan, DIT ho UNPAZ presiza prienxe kritériu sira ne’ebé ministériu iha molok sira loke kursu doutoramentu.
Atu hetan lisensa loke dotouramentu ne’e nia kritériu ida mak akompañamentu Ajénsia Nasionál Avaliasaun no Akreditasaun Akadémika (ANAAA) nia durante fulan-neen ba kotuk, haree iha kursu lubuk ida maka hatama ona relatóriu auto avaliasaun no iha programa estudu balun maka iha ona preparasaun di’ak atu partisipa iha avaliasaun programátiku.
Hosi formatu ne’ebé ANAAA prepara, iha padraun 10 ho indikadór 108 maka kada kursu sira tenke hato’o informasaun, hahú hosi mehi instituisaun ka kursu ida ninia vizaun no misaun, hafoin kada kursu ka programa tenke hato’o área atuasaun, karik programa akadémiku sira tenke aprezenta mós nível saida maka eziste baxarelatu, lisensiatura ka mestradu.
Nune’e mós, kona-ba kurríkulu tenke klaru, nune’e to’o ramata tenke hetan mós rezultadu aprendizajen.
Notísia relevante: UNPAZ sei haruka dosente 30 tuir formasaun kona-ba pedagojia
Jornalista : Osória Marques
Editora : Rita Almeida
