PNTL na’in-17 iha Kovalima tama ona iha lista reforma obrigatória
KOVALIMA, 27 fevereiru 2025 (TATOLI)- Komandu Polísia Nasionál Timor-Leste (PNTL) Munisípiu Kovalima daudaun ne’e rejista, PNTL na’in-17 iha 2025 mak tama ona lista reforma obrigatória.
Komandante PNTL Munisípiu Kovalima, Superintendente Inacio Amaral, relata katak, daudaun ne’e, PNTL na’in-17 mak tama ona iha lista reforma obrigatória iha 2025 , tanba ne’e bainhira halo rekrutamentu presiza atu troka iha sira-nia fatin.
“Ho númeru ne’ebé tama iha lista reforma ita rekomenda bainhira planu halo rekrutamentu 2025 ne’e la’o Komandu PNTL Kovalima presiza membru PNTL mínimu 30 másimu ajente 50 hodi bele reforsa fali fatin ne’ebé ohin ha’u mensiona atu prense fali”, Superintendente Inacio Amaral dehan ba jornalista sira iha Santa Rosa.
Komandante ne’e dehan, PNTL na’in-17 ne’ebé nia naran tama iha lista reforma obrigatóriu ne’e kompostu husi reforma obrigatória na’in-15 no na’in-rua nia naran tama iha lista pre-reforma obrigatória.
Tuir dadus ne’ebé Komadante PNTL Kovalima Superintendente Inacio Amaral aprezenta katak PNTL ne’ebé presta sira-nia servisu hodi garante seguransa iha Kovalima hamutuk 159. Husi númeru ne’e, na’in-88 koloka ba eskuadra hitu.
Kolokasaun PNTL iha kuadra sira hanesan, Eskuadra Suai Koloka PNTL na’in-22, Tilomar 11, Fohorem 12, Fatululik neen (6), Fatumea sia (9), Maucatar 10 no eskuadra Zumalai koloka PNTL na’in-18.
Fó hanoin fali katak, iha loron 05 fevereiru 2025 ne’e, Konsellu Ministru (KM), Aprova projetu rezolusaun Governu kona-ba defini nesesidade rekrutamentu ba polísia iha 2025 ne’e liuhusi konkursu públiku ba admisaun kursu formasaun ajente no kursu formasaun ofisiál.
Projetu rezoluzasaun Governu ne’ebé hetan aprovasaun husi Konsellu Ministru (KM) ne’e, aprezenta husi Ministru Interiór (MI), Francisco da Costa Guterres.
Iha 2025 ne’e sei rekruta PNTL membru foun hamutuk na’in-500 ne’ebé 400 ne’ebé sei tama iha kursu formasaun ajente no na’in-100 iha kursu formasaun ofisiál.
Jornalista:Celestina Teles
Editór: Rafael Ximenes de A. Belo
