Prezidente Komisaun F rekomenda HNGV haluan bee dalan prevene inundasaun
DILI, 27 Fevereiru 2025 (TATOLI) – Prezidente Komisaun F iha Parlamentu Nasionál (PN) ne’ebé trata asuntu Saúde, Seguransa Sosiál no Igualidade Jéneru, Deputada Maria Gorumali Barreto, rekomenda ba Ospitál Nasionál Guido Valedares (HNGV, siglá portugés) haluan bee dalan ne’ebé iha hodi bele prevene inundasaun iha tempu udan.“Komisaun husu ba dirijente no Ministra Saúde oinsá atu haree mós valeta ne’ebé mak fó impaktu ba iha HNGV hodi rezolve tiha asuntu ida-ne’e,” nia ko’alia iha resintu PN, kinta ne’e.
Nia haktuir, semana kotuk udan boot, akontese bee tama iha korridór ninin maibé la tama liu ba iha sala baixa pasiente sira, tanba iha HNGV valeta bee dalan ladún luan ka ki’ik. Iha tinan 2021 akontese inundasaun boot iha HNGV bee tama iha ospitál laran, tanba de’it komunidade hirak-ne’ebé hela besik ospitál taka tiha valeta kuak.
“Halo konfirmasaun ho dirijente sira iha HNGV esplika situasaun iha ospitál, tanba ho volume bee maka’as,’’nia akresenta.
“Mas sira sempre antesipa bainhira udan asegura kedas ho materiál ne’ebé iha no esforsu bee labele sa’e to’o iha sala baixa pasiente.’’
Nia dehan, HNGV iha hela konstrusaun ba iha ospitál pediátria nian no sei ba maternidade entaun bele identifika oinsá solusiona haluan bee dalan hodi prevene inudasaun, tanba agora tempu udan ne’ebé sempre loro-loron mai ho intesidade boot.
Jornalista: Nelson de Sousa
Editór: Evaristo Soares Martins
