KOVALIMA, 27 fevereiru 2025 (TATOLI) – Diretór EBC Suai Loro, Fernando António, pasa ona informasaun ba diretóra EBC sesante katak tempu-badak atu simu ona osan ba kargu xefia tanba durante asumi kargu seidauk simu osan ba kargu asumidu.
“Ami simu ona orientasaun husi Servisu Edukasaun Kovalima atu pasa informasaun ba eis-diretora eskola sesante sira katak tempu-badak sira sei simu sira-nia osan ba kargu”, Fernando António, informa ba TATOLI, iha EBC, Suai Loro, ohin.
Hafoin simu orientasaun husi Servisu Edukasaun Kovalima, atuál diretór EBC Suai Loro, pasa kedas informasaun ba diretora EBC, Xefe Gabinete no Adjuntu Suai Loro sesante katak, iha tempu-badak sei simu osan ba kargu xefia nune’e labele hamosu dúvida ba sira.
Dirijente eskola ne’e dehan, diretora ho nia Xefe gabinete no adjuntu EBC Suai Loro asumi kargu hahú iha 2022 no to’o agostu 2023, maibé seidauk simu osan ba kargu xefia.
Nune’e Governu presiza atu fó atensaun ba profesór sira, bainhira atribui kargu ba profesór sira, presiza atu haree no prosesa mós sira-nia osan ba kargu xefia nune’e bele motiva sira.
“Agradese ba profesór sira maske la’ós ona asumi kargu xefia, maibé profesór sira la ejije bainhira Governu fó sira simu, la fó mós sira la ejize; nafatin hala’o sira-nia servisu hodi hanorin alunu sira”, nia dehan.
Diretora Servisu Edukasaun Munisípiu Kovalima Elda de Fatima klarifika, bazeia ba rekursu nasionál promete katak pagamentu diretór eskola sesante ne’ebé mak seidauk simu osan kargu, sei halo pagamentu iha marsu ka abríl tanba munisípiu haat seluk simu ona.
“Edukasaun Kovalima fó hanoin bainhira profesór sira-nia konta bankaria osan liu fali saláriu ne’ebé ita-boot sira simu labele dúvida tanba osan referidu osan ba asumi kargu ne’ebé mak durante ne’e seidauk simu”, nia dehan.
Tuir dadus profesór husi Eskola pre-eskolár (EPE), Ensinu Báziku Sentrál (EBC), Ensinu Sekundáriu (ES) no Ensinu Tékniku Vokasionál ne’ebé hanorin iha munisípiu Kovalima hamutuk 982. Husi númeru ne’e, mane 589 no feto 393.
Jornalista:Celestina Teles
Editór: Rafael Ximenes de A. Belo
