DILI, 28 Fevereiru 2025 (TATOLI)-Prezidente Asosiasaun Médika Katólika Timor-Leste (CMATL, sigla inglés), Laura António de Jesus, sesta ne’e hasoru Xefe Estadu, José Ramos Horta, hodi informa kona-ba projetu CMATL nian.
“Ami espera katak futuru Estadu no governu bele apoiu, nune’e projetu ne’e nia sustentabilidade ba oin bele la’o ho di’ak. Bele apoiu ami hanesan médiku nune’e kapasita ami hodi ami fó asisténsia saúde ba komunidade iha área rurál”, Prezidente CMATL hatete ba jornalista sira iha Palásiu Prezidensiál.
Nia hatutan: “Apoiu ne’ebé Prezidente Repúblika fó mai ami ne’e hanesan rekomendasaun ba ami-nia asosiasaun, bele hasa’e ami-nia kredibilidade, nune’e projetu no programa sira-ne’ebé ami implementa no mós bele rekoñese ami-nia asosiasaun iha futuru”.
Nia espera, CMATL iha sustentabilidade. Tanba ne’e mak nafatin halo koordenasaun ho Prezidente Repúblika.
Asosiasaun ne’e eziste iha Novembru 2024, ho membru na’in-13. Maibé membru asosiasaun ne’e hahú estudu iha medisina iha UNTL, kada tinan sira sempre halo asaun karidade ba komunidade iha área rurál. Kariedade ne’e entermu fahe koñesimentu saúde ba komunidade no seluk tan.
Jornalista : Osória Marques
Editora : Rita Almeida
