KOVALIMA, 28 fevereiru 2025 (TATOLI)- Konsellu Munisipál Kombatente Libertasaun Nasionál (CMCLN, sigla portugés) Kovalima, submete tan ona fixa reklamasaun no kontestasaun mai husi postu neen hamutuk 1.078 ba faze daruak nian.
“Ohin mak ita submete tan ona fixa reklamasaun no kontesaun ba Ministériu Asuntu Kombatente Libertasaun Nasionál hamutuk 1.078 ba faze daruak ne’ebé mak husi postu administrativu Fatumea, Fohorem, Tilomar, Maucatar, Suai no Zumalai “, Sekretáriu CLN Kovalima, Joaquim da Costa ‘Sikatlet’ informa ba TATOLI iha Tabakolot, ohin.
Fixa reklamasaun no kontestasaun hamutuk 1.078 ne’e mai husi CLN 3 a 7 na’in-115, CLN tinan 0 a 3 na’in 893, la’os CLN 19, Martir 15, CLN ne’ebé halo kontestasaun mai husi postu rua hamutuk sia, husu atu hadi’a na’in-22. Ho nune’e Diretór Nasionál Subvensaun atu halo rejistu iha sistema ba dadus.
Fixa reklamasaun no kontestasaun 1.078 mai husi postu administrativu neen hanesaun husi postu administrativu Fatumea na’in-rua, Fohorem 130, Tilomar 25, Maucatar 492, Suai 286 no Zumalai 106 maibé husi postu administrativu Fatululik la iha pesoál hato’o reklamasaun no kontestasaun ba faze daruak ni’an.
Fó hanoin fali katak, iha loron 19 fevereiru ne’e Konsellu Munisípiu Kovalima submete ona fixa reklamasaun no kontetasaun ba Ministériu Asuntu Kombatente Libertasaun Nasionál mai husi postu administrativu hitu ba faze dahuluk hamutuk 1,819.
Fixa reklamasaun no kontesaun hamutuk 1,819 kompostu husi pesoál ne’ebé mak CLN, 3 a 7 hamutuk 315, 0 a 3 hamutuk1,418 no la’ós Konsellu Libertasaun Nasionál (CLN) hamutuk na’in-64.
Ministériu Asuntu Kombatente Libertasaun Nasionál fó sai dadus editál ba rejista daruak iha 2009 mai husi Postu administrativu Fatululik, Fatumea, Fohorem, Tilomar, Maucatar, Suai no Zumalai hamutuk 7,945 publika, iha loron 15 janeiru ne’e.
Jornalista:Celestina Teles
Editór: Rafael Ximenes de A. Belo
