DILI, 28 Fevereiru 2025 (TATOLI) – Ministru Petróleu no Rekursu Minerál (MPRM), Francisco Monteiro, aprezenta análize husi rezultadu ekonómiku husi relatóriu ba Konseitu Estudu husi Wood Group, ne’ebé avalia opsaun oioin husi dezenvolvimentu kampu Greater Sunrise ba reprezentante husi Fundu Monetáriu Internasionál (FMI), Yan Carriere-Swallow.
“Estudu konfirma katak konseitu hotu ne’ebé aprezenta, inklui Timor-Leste Gás Naturál Likifeitu (TLGNL), Darwin GNL, Itchtys GNL, no instalasaun GNL foun iha Austrália, téknikamente viavel hotu, maibé TLGNL destaka hanesan opsaun kompetitiva liu”, haktuir nota ne’ebé Tatoli asesu, no iha sorumutu ne’e parte rua aborda kona-ba xave husi dezenvolvimentu setór oléu, gás no minerál iha Timor-Leste.
Dokumentu ne’e realsa katak husi estudu konsidera TLGNL hanesan opsaun ne’ebé proporsiona retornu finanseiru di’ak liu ba Greater Sunrise Joint Venture, iha benefísiu ekonómiku globál boot liu ba Timor-Leste no impaktu sosioekonómiku signifikativamente, liuhusi kreximentu husi Produtu Internu Brutu (PIB) no kriasaun empregu.
“TLGNL oferese ekonomia forte, garante retornu finanseiru maka’as la’ós de’it ba Estadu, ba mós parseiru husi Sunrise Joint Venture (SJV), nomós kontribui ba dezenvolvimentu nasionál ba tempu naruk”, dehan.
Governante ne’e salienta katak Timor-Leste kontinua empeña hodi avansa projetu ne’e, hanesan forma ida atu maximiza benefísiu ba Estadu.
Iha sorumutu ne’e ministru no reprezentante FMI mós foka ba potensialidade setór mineiru iha diversifikasaun ekonómika. Deskreve esforsu esplorasaun ne’ebé la’o daudaun no estratejia husi Governu hodi dezenvolve rekursu naturál, hanesan pilár fundamentál ida ba kreximentu ekonómiku iha Timor-Leste.
Jornalista: Arminda Fonseca
Editora: Maria Auxiliadora
