VIKEKE, 28 fevereiru 2025 (TATOLI)— Veteranu Afonso Soares ‘Sakalo’, husu Governu dezenvolve fatin akampamentu FALINTIL hodi sai sítiu turismu rezisténsia, atu jerasaun foun sira bele hatene istória pasadu.
“Ha’u hakarak husu ba Governu tau importansia ba fatin akampamentu FALINTIL ne’ebé lokaliza iha suku Matahoi. Tanba fatin ne’e nu’udar kunuk ba konsentrasaun FALINTIL, hafoin ba tiru malu ho militár Indonézia sira. Tan ne’e, fatin ne’e sai Istória ba ita-nia jerasaun sira tuir mai, se ita la tau importansia, ba futuru jerasaun foun sira sei haluha fatin ida-ne’e”, Afonso Soares ‘Sakalo’ hateten ba jornalista sira, hafoin vizita fatin akampamentu FALINTIL, iha Beto Bo’o, suku Matahoi, postu Uatulari, sesta ohin.
Daudaun ne’e Sakalo hateten, Timor-Leste agora hetan ona independésia nune’e Governu presiza promove fatin istóriku funu nian ne’ebé uluk luta libertasaun nian.
“Fatin sira-ne’e Governu presiza tau sinál ruma, atu jerasaun foun ruma mai vizita, turismu sira hakarak mai vizita vizita fatin funu nian, karik sira bele mai iha fatin ida-ne’e. Tanba fatin ida-ne’e iha tinan 1976 FALINTIL tantu husi loro monu, loro sa’e hotu-hotu konsentrasaun hamutuk iha ne’e, depois troka malu ba kontra invasór”, nia dehan.
Tanba ne’e nia dehan, fatin Betu Bo’o nu’udar knuk ba FALINTIL iha tempu okupasaun no fatin sira-ne’e bainhira promove di’ak ema mai vizita sei fó reseita mós ba komunidade sira-ne’ebé hela besik.
Iha fatin hanesan reprezentante Prezidente Autoridade munisípiu Vikeke, Luis Antonio Soares, haktuir, fatin Beto Bo’o sai hanesan baze FALINTIL nian hodi konsentra hamutuk hodi kontra okupasaun militár Indonézia nune’e fatin ne’e sai istóriku ba timor-oan sira.
“Tan ne’e, ita presiza hamutuk hodi preserva fatin istóriku ida-ne’e. Tanba nasaun ida forte sempre lahaluha istória pasadu. Nune’e ohin Komandante Sakalo husu atu dezenvolve fatin istóriku ida-ne’e sai fatin turismu, ami autoridade munisípiu, postu no veteranu, atu oinsá ita preserva fatin istóriku referida,” nia hato’o.
Vizita fatin istóriku Betu Bo’o hetan partisipa husi autoridade lokál, veteranu, membru FALINTIL Forsa Defeza Timor Leste (F-FDTL) no komunidade husi postu Uatulari.
Jornalista : Vitorino Lopes da Costa
Editóra : Armandina Moniz
