DILI, 03 Marsu 2025 (TATOLI)—Prezidente Liga Futeból Timor-Leste (LFTL) eleitu ba períodu 2025-2029, Ipolito Soares, promete sei prepara fundu $1.360,000,00 atu realiza liga futeból époka 2025.
Orsamentu referidu kompostu husi subsídiu ba primeira divizaun $70.000×10=$700.000, segunda divizaun $30.000×10=$300.000, prémiu kampiaun primeira divizaun $60.000, segunda divizaun $30.000, prémiu ba jogu primeira divizaun $2.000×90=$180.000, segunda divizaun $1.000×90=$90.000.
Ipolito hato’o ninia kompromisu ne’e liuhusi Kongresu Nasionál daruak LFTL ne’ebé hala’o iha Xanana Sport Center, Bairros dos Grilos, sábadu (01/03/2025), iha-ne’ebé nia kompete ho ninia rivál Abrão Oliveira, ex Prezidente Klube Zebra Baucau, ho votu 19, enkuantu Abrão hetan votu 16.
“Hanesan Prezidente ba LFTL husu ba Governu nafatin apoiu nune’e liga ne’e bele la’o ho di’ak bá-oin,” Ipolito Soares dehan bainhira ramata votasaun.
Nia dehan, sei servisu hamutuk ho Federasaun Futeból Timor-Leste (FFTL) atu lori futeból bá- oin ho di’ak.
”Ita tenke servisu hamutuk tanba vitória ida-ne’e atu servisu ba povu Timor-Leste no husu Governu atu servisu hamutuk ho Órgaun Liga,” nia informa.
Iha fatin hanesan, Vise Prezidente Asembleia Jerál LFTL, Osório Florindo da Costa, dehan Liga Futeból Timor-Leste kontinua la’o maski enfrenta dezafiu barak, maibé bazeia ba moto ne’ebé mak iha katak orgullu nasionál.
“Maski ita iha situasaun difísil barak ne’ebé ita enfrenta, ema hotu hakarak bola ne’e tenke la’o,” Osório tenik.
Aleinde ne’e, Ministru Juventude, Desportu, Arte no Kultura, Nelyo Isaac Sarmento, hateten bainhira sira eleitu tiha, sei enkontru hamutuk entre Órgaun Liga, Governu ho FFTL atu haree liga hahú bainhira.
“Tanba ne’e mak sira halo diskusaun ba, hadi’a organizasaun, sira ne’ebé eleitu ne’e trasa planu ba. Governu preparadu no prontu atu ita haree liga ne’e bá-oin, tanba kongresu ida-ne’e sinál pozitivu. Governu la husik sira mesak,” governante ne’e dehan.
Nia afirma, Governu liuhusi Ministériu Juventude, Desportu Arte no Kultura apoiu fundu ba kongresu ne’e hamutuk rihun $350.
Entretantu, Prezidente Federasaun Futeból Timor-Leste (FFTL), Nilton Telmo Gusmão dos Santos, dehan futeból la’ós de’it jogu ida, maibé futeból ne’e sai hanesan paisaun nasionál, instrumentu ida-ne’ebé poderozu ba transformasaun sosiál no mós símbolu uniaun ba povu.
“Hanesan Prezidente FFTL, dala ida tan ha’u hakarak dehan misaun ida-ne’ebé ita hotu tenke halibur hodi halo mak hamutuk ho hanoin ida atu transforma futeból sai orgullu nasionál. Atu hetan objetivu ne’e, Órgaun Liga Futeból Timor-Leste (LFTL) sei sai hanesan pilár importante ida atu hamoris paisaun no orgullu nasionál iha ita-nia futeból,” Nilton informa.
Nia haktuir, reativa hikas Liga Futeból, ida-ne’e la’ós de’it nesesidade desportiva ida, maibé nu’udár responsabilidade sosiál atu fó esperansa ba juventude timoroan sira.
“Ita hakarak ita-nia juventude ho futuru ida-ne’ebé klaru, la’ós tama iha atividade destrutivu ne’ebé la fó estabilidade no amizade entre sira. Futeból bele hadi’a mentalidade, fó espasu ba juventude atu aprende kompetisaun no hetan esperiénsia atu hadi’a moris. Ha’u iha konviksaun tomak katak bainhira ita oferese biban estrutura kompetitiva forte, ita sei ajuda transforma mentalidade juventude timoroan nia disiplina, espíritu ba ekipa no ambisaun atu sai vensedór,” nia subliña.
Prezidente FFTL haktuir katak realidade tinan tolu liu kompetisaun liga la la’o iha Timor-Leste, tan ne’e kongresu ida-ne’e importante tebes atubele hetan líder definitiva atubele lidera Órgaun Liga hodi reativa hikas Liga Futeból iha tempu badak, hodi fó oportunidade ba klube sira no juventude atu kontinua sira-nia kareira futeból.
Jornalista: Felicidade Ximenes
Editór: Xisto Freitas da Piedade
