VIKEKE, 04 Marsu 2025 (TATOLI)—Xefe suku Uaimori, postu administrativu Vikeke vila, munisípiu Vikeke, Francelino Antonio Gomes, informa abitante aldeia Meauain no Uatulesu iha suku Uaimori to’o agora seidauk asesun liña telekomunikasaun.
“Ha’u-nia suku iha aldeia haat mak foin lalais operadór Telekomsel instala sira-nia tore iha ne’ebá, nune’e daudaun ne’e sira asesu ona liña komunikasaun telkomsel. Maibé, aldeia rua mak to’o agora seidauk asesu, difikulta komunidade no xefe aldeia sira tanba asuntu importante ruma sira, atu kontaktu ha’u ne’e sai difisil tanba rede komunikasaun laiha,” Xefe suku Uaimori hateten ba jornalista sira iha resintu autoridade munisípiu Vikeke, ohin.
Liña telekokmunikasaun ne’e importante tebes, tanba ohin loron mundu teknólojia fasilita ema halo komunikasaun fasil hanesan situasaun emerjénsia sira ruma bele komunika ba malu liuliu ho telemovél lalais.
“Nune’e, ha’u sente liña komunikasaun sai importante ba komunidade iha área rurál hanesan dezastre naturál no moras emerjénsia ruma mosu iha aldeia rua ne’ebá, difisil tebes atu komunika parte relevante sira hanesan Auotridade Protesaun Sivil (APC, sigla portugés) no parte saúde sira susar tebes komunika ba ha’u-nia komunidade. Durante ne’e, akontese moras emerjénsia ruma komunidade tenke ba buka rede, hafoin sira bele kontaktu ba ita, maibé ita mak atu telefone ba sira-ne’e la bele tanba rede laiha,” nia dehan.
Preokupasaun sira-ne’e, nia parte aprezenta ona pedidu ba Timor Telekom no Telemor hodi instala tore ruma iha aldeia rua ne’e atu asesu netik ba liña komunikasaun.
“Preokupasaun ne’e ha’u halo pedidu ba empreza Timor Telekom no Telemor, hodi instala sira-nia rede iha ha’u-nia aldeia rua ne’ebé seidauk asesu ba liña komunikasaun. Maibé, to’o agora empreza telekomunikasaun sira-ne’e seidauk fó resposta ruma ba pedidu ne’ebé ha’u hato’o ba,” nia dehan.
Nune’e, nia husu Governu liuhusi Ministériu Transporte no Komunikasaun (MTK) koordena ho empreza telekomunikasaun sira hodi instala rede ba telekomunikasaun atu komunidade área rurál bele asesu.
Tuir dadús, totál uma kain husi aldeia rua ne’ebé seidauk asesu ba liña komunikasaun mak populasaun iha aldeia Uatulesu totál uma kain hamutuk 532 no aldeia Meauai totál uma kain 62 ne’ebé hela iha área rurál.
Jornalista : Vitorino Lopes da Costa
Editór : Cancio Ximenes
