DILI, 04 Marsu 2025 (TATOLI)—Diretór Servisu Apoiu Diagnóstiku no Terapeútika iha Ospitál Nasionál Guido Valadares (HNGV-sigla portugés), Vidal de Jesus Lopes, hateten eletrisidade mate iha HNGV tanba kauza husi nivel sentrál no panel ATS (Automatic Transfer Switch) nakfera, maibé la fó impaktu ba pasiente sira.
“Ahi mate ne’e iha problema rua. Ahi mate husi nivel sentrál mai afeta ba funsionamentu HNGV nian, no problema daruak mak ami bolu Panel ATS ne’e keimadu tiha. ATS Panel ne’e instrumentu ne’ebé regula enerjia eletrisidade entre fonte prinsipál no fonte rezervada hanesan jeradór ka batre. Tan ne’e, normalmente, bainhira EDTL.EP nia ahi mate, Panel ATS ne’e funsiona automátika hodi distribui enerjia eletrisidade,” Vidal ba jornalista sira iha nia kna’ar fatin, HNGV, tersa ne’e, relasiona ho enerjia eletrisidade ne’ebé mate iha HNGV kuaze oras naruk iha 01 Marsu liubá.
Nia esplika, momentu ne’ebá tékniku HNGV sira esforsu no konsege hadi’a, maibé uza manuál de’it no han tempu kuaze oras ida, tanba relasiona ho eletrisidade ne’e iha risku boot ba ema-nia vida.
“Iha kalan ne’e kedas tékniku sira hamutuk hodi troka Panel ATS. Agora eletrisidade funsiona hanesan babain ona,” nia haktuir.
Dirijente ne’e hateten, iha bebé na’in rua mak mate iha momentu ne’ebá, más la’ós kauza husi ahi mate, maibé bebé nia kondisaun mak grave duni.
Jornalista: Felicidade Ximenes
Editór: Xisto Freitas da Piedade
