APC Vikeke apoia nesesidade bázika ba vítima dezastre naturál uma kain 73
VIKEKE, 04 Marsu 2025 (TATOLI)—Komadante Autoridade Protesaun Sivil (APC, sigla portugés) munisípiu Vikeke, Cirilio Soares Gomes, informa APC munisípiu Vikeke apoia nesesidade bázika ba vítima dezastre naturál hamutuk uma-kain 73.
Nia haktuir, pakote emerjénsia ne’e kompostu husi foos, mina-tein, supermie, sardina, susu-been, kafé, masin-midar, biskuit no pakote sira seluk.
“Iha fulan-Fevereiru ne’e akontese anin boot no udan afeta ba komunidade uma kain 73 sai afetadu ba dezastre naturál. Husi númeru afetadu ne’e, ami distribui hotu pakote emerjénsia ba vítima sira hodi auguenta sira nia moris iha situasaun dezastre ne’ebé ita-nia komunidade enfrenta,” Komadante APC munisípiu Vikeke ne’e hateten ba Tatoli, iha nia kna’ar fatin, Sira-Laran, ohin.
Distribuisaun pakote emerjénsia ne’e, nia dehan, vítima balun mai foti direta iha armazen APC no balun mak APC lori direta ba vítima sira-nia hela fatin.
“Apoia emerjénsia ne’e ita-nia vítima balun mai foti direta no balun mak ami lori direta lori pakote emerjénsia ba ita-nia vítima sira-nia rezidénsia. Hanesan Lakluta, vítima uma-kain efetadu hitu ne’ebé ohin ami tula pakote emerjénsia ba vítima sira,” nia dehan.
Nia dehan, uma kain 73 ne’ebé hetan dezastre naturál ho tipu estragu aat totál tanba sira-nia uma hetan estragu totál.
“Husi dadús sira-ne’e APC Vikeke halo ona verifikasaun no ami submete ona dadús sira-ne’e ba nasionál ba materiál rekuperasaun nian,” nia dehan.
Ba materiál rekuperasaun, nia hateten, apoia materiál rekuperasaun ba vítima dezastre naturál ne’e nasionál mak sei deside bainhira mak fó apoia ba vítima sira, dadús vítima dezastre naturál husi fulan-Fevereiru nian ne’e, APC rekolla aprezenta ona ba nasionál.
Entretantu, husi númeru afetadu uma-kain 73 mai husi postu administrativu Vikeke Vila, Lakluta, Uatukarbau, Ossú no Uatulari.
Jornalista : Vitorino Lopes da Costa
Editór : Cancio Ximenes
