DILI, 04 Marsu 2025 (TATOLI)-Prezidente Komisaun F iha Parlamentu Nasionál (PN) ne’ebé trata asuntu Saúde, Igualidade Jéneru no Inkluzaun Sosiál, Maria Gorumali Barreto, hatete vítima iha kompeténsia halo keixa bainhira hetan violénsia. Tanba, asédiu seksuál ne’e krime públiku.
“Se de’it komete asaun violénsia, bainhira vítima ne’e sente ida ne’e violénsia, ne’e se de’it mak hetan tanba ne’e krime públiku, ita iha kompeténsia halo keixa ba entidade relevante hodi prosesa”, dehan deputada husi bankada Governu Kongresu Nasionál Rekonstrusaun Timorense (CNRT, sigla portugés) ba TATOLI iha uma fukun, ohin.
Tanba ne’e, nia husu hapara asédiu seksuál no violénsia oioin iha eskola sira. “Tuir konvensaun direitu labarik katak, bainhira labarik iha kualkér situasaun ne’ebé akontese violasaun ne’ebé grave ou labarik iha situasaun ida ne’ebé perígu, ita iha lei ne’ebé bele akuza autór ba justisa”.
Nia konsidera asédiu seksuál ne’e parte tipu violénsia hasoru labarik. Bainhira akontese iha eskola, prátika husi manorin tenke prosesa tuir dalan legál.
Notísia relevante: Estadu la-tolera asédiu seksuál iha eskola
Deputada ne’e husu Ministériu Edukasaun (ME) tenke foti sansaun administrativa ba manorin na’in ne’ebé prátika aktu ne’e hodi fó tempu hatán iha parte justisa. Nune’e mós, Ministériu Solidariedade Inkluzaun Sosiál (MSSI) ho ninia parseiru ne’ebé jere uma mahon kontinua fó asisténsia ba vítima hodi hetan konfiansa no seguru fó ninia sasin ba ME atu bele proteje labarik hodi kontinua asesu edukasaun.
Jornalista : Nelson de Sousa
Editora : Rita Almeida
