Estrada diresaun Maliana-Bobonaru iha fatin tolu ameasadu kotu
BOBONARU, 04 Marsu 2025 (TATOLI)—Komunidade Bobonaru preokupa ho kondisaun estrada diresaun husi kapitál Maliana bá postu administrativu Bobonaru, munisípiu Bobonaru ne’ebé daudaun ne’e ameasadu kotu iha fatin tolu hanesan iha área Ilibole, aldeia Anahun, suku Odomau no Galisapulu, suku Lahomea.
Komunidade, Filomeno Lopes, observa estrada iha pontu tolu ne’e ameasa atu kotu tanba rai monu hela de’it ona espasu ba karreta ida-nia de’it ona.
Notísia Relevante: Administradór hato’o preokupasaun problema Estrada Maliana-Bobonaro ba MOP
“Agora karreta rua labele hasoru malú, atu halai liu karreta ida tenke para, depois mak ida liu fali, tanba estrada ninin hela rohan de’it ona, liuliu ida iha Galisapulu ho Odomau nia ne’e. Foin lalais, estrada monu komunidade mak tau fatuk ho rai para fasilita ema liu. Sorte, agora loron rua la udan, se ba oin mak udan tun makaas tan ne’e, estrada sira-ne’e bele kotu, movimentu Bobonaru-Maliana bele paradu totál”, nia informa ba TATOLI iha Odamatan Boot (Pintu Gerbang) Odomau, tersa ne’e.
Tuir Filomeno, bainhira estrada hirak ne’e kotu aleinde difikulta movimentasaun públiku, afeta mós ba atividade ekonomía iha baze no saúde.
“Estrada kotu automatikamente folin foos sa’e no sasán seluk tan, tanba husi Bobonaru ba hola foos no sasán iha Dili no Maliana. Ha’u fó ezemplu, sira sosa $15 mai faan fali bele to’o $20 tanba sira tula mai sei selu ema lalin, depois saúde mós araska. Bainhira, ita moras ruma atu transfere ba Hospitál Maliana mós ladi’ak, karreta ambulánsia labele liu. Se hakarak obriga ba tenke leba, ida-ne’e ita ko’alia de’it, karik estrada sira-ne’e kotu,” nia dehan.
Motorista Kamioneta, Manuel de Jesús Lopes, rekomenda ba Governu liuhusi Ministériu Obra Públika atu halo intervensaun imediata molok akontese estrada kotu totál.
“Ita-nia Governu presiza tau-matan tanba estrada sira-ne’e kuandu kotu, laiha tan dalan alternative seluk. Se Estrada ne’e kotu, entaun signifika movimentu karreta ho motorizada paradu ka la la’o. Ema ho sasán mós ‘estafeta’ transfer husi krareta ida ba kaereta seluk. Agora de’it ami tula rai-henek todan liu ba sente tauk tanba iha kraik mamar hela. Ha’u hanoin udan tau-tan loron rua iha Galisapulu ho Odomau ne’e bele monu ona, tanba moru protesaun laiha ida,” nia dehan.
Enkuantu foin lalais ne’e Administradór Postu Administrativu Bobonaru, Munisípiu Bobonaru, Tomás Henriques, entrega diretamente pedidu ida Ministru Obra Públika, Samuel Marçal, atu halo normalizasaun ba estrada hirak ne’e hodi fasilita movimentu públiku iha tempu udan.
Tuir observasaun Tatoli iha terrenu nota katak movimentasaun transporte motorizada normál hela. Maibé, ba karreta atu ultrapasa, ema ida ou rua tenke tun haree, tanba estrada iha fatin tolu ne’e rai iha parte karuk no kuana monu no mamar hotu ona.
Estrada diresaun Kapitál Maliana ba postu administrativu Bobonaru ne’e, iha tinan 2017 ne’e, Ministériu Obra Públika, Transporte no Komunikasaun, kontrata kompańia lokál Vieramor Unipesoál, Lda, hodi halo manutensaun estrada no ponte ho kustu milaun $2,060, 737.42, maibé projetu ho karáter emerjénsía ne’e to’o agora seidauk finaliza no paradu hela.
Notísia Relevante: Komunidade preokupa projetu manutensaun estrada Maliana-Bobonaro
Jornalista : Sergio da Cruz
Editór : Cancio Ximenes
