VIKEKE, 04 Marsu 2025 (TATOLI)—Governu Liuhusi Ministériu Agrikultura Pekuária, Pedka no Floresta (MAPPF) hahú entrega karau timor hamutuk 11 hodi prepara ba prodús karau susu-been iha sentru agró-komérsiu Ratahu, suku Uma Uain Kraik, postu Vikeke Vila, munisípiu Vikeke.
” Ida-ne’e sai hanesan projetu pilotu ba produsaun karau susu-been. Karik ida-ne’e mak la’o susesu, ba oin, ita sei aumenta karau hodi prodús karau susu-been iha ita-nia rain liuliu iha munisípiu Vikeke,” Diretór Servisu Ministériu Agrikultura Pekuária, Peska no Floresta (SMAPPF), Olivio Freitas Soares, hateten ba Tatoli, iha resintu autoridade munisípiu Vikeke, ohin.
Kona-ba preparasaun, nia dehan, daudaun ne’e parte tékniku agrikultura sira-ne’ebé servisu iha sentru agró-komersiu Ratahu, sira agora komesa halo karau nia luhan hodi hatama karau ba luhan laran atu fó han karau sira
“Tanba ita iha ona karau 11 mak agora kesi iha sentru agró-komérsiu Ratahu no karau Timor ne’e ita sosa komunidade nian iha Vikeke. Orsamentu ba sosa karau ne’e, sira nasionál mak hatene, ami simu de’it kuantidade animál ne’ebé oferese ba ita,” nia dehan.
Planu produsaun karau susu-been ne’e, nia dehan, atu responde mánutrisaun, tanba ne’e MAPPF planeia prodús karau nia susu-been.
Enkuantu, karau Timor ne’ebé hatama iha sentru Agró-Komersiu Ratahu hamutuk 11 no husi númeru ne’e karau-inan hamutuk 10 no karau-aman ida (1).
Jornalista : Vitorino Lopes da Costa
Editór : Cancio Ximenes
