DILI, 04 Marsu 2025 (TATOLI)—Hospital Nasional Guido Valadares (HNGV) preparadu ona hodi halo atendimentu saúde ba atleta sira iha jogu Comunidade dos Países de Língua Portuguesa (CPLP) iha Timor-Leste, jullu tinan ne’e, maski seidauk iha enkontru ida ho ekipa Komisaun Téknika Akompañamentu (CTA-sigla portugés).
“Ema mai ita-nia rai presiza preparasaun saida mak ita bele prepara no sira la mai enkontru mós sistema iha hela, para bele responde karik ema monu bá situasaun tohar ka kanek ruma durante hala’o atividade desportu,” Diretór Servisu Apoiu Diagnóstiku no Terapeutiku HNGV, Vidal de Jesus Lopes ba Jornalista sira iha nia kna’ar fatin, HNGV, Bidau, tersa ne’e.
Diretór ne’e hatutan HNGV presiza enkontru ho CTA hodibele responde ba eventu desportu ida-ne’e.
Vidal haktuir katak antes ne’e parte CTA haruka ona karta bá HNGV hodi realiza enkontru, maibé to’o agora seidauk realiza.
Notísia relevante: CTA aprezenta relatóriu jogu CPLP
Antes ne’e, Vise-Ministru ba Fortalesimentu Institusionál Saúde, José dos Reis Magno, hateten kona-ba pesoál saúde hira mak atu koloka bá iha jogu CPLP ne’e sei hein Komisaun Organizadora atu relata ba sira, liuliu kona-ba atleta no ofisiál sira-nia fatin atu deskansa no mós kada otél na’in hira mak hela ba, hafoin bele destaka pesoál saúde ba iha-ne’ebá.
“Ba ita laiha problema tanba durante vizita Amu Papa nian ita hotu akompaña katak Ministériu Saúde la’ós mesak maibé servisu hamutuk ho Organizasaun Nasaun Unida no mós parseiru sira inklui Cruz Vermelha de Timor-Leste (CVTL) rasik. Ita servisu hamutuk, forsa sira-ne’e ita sei tau hamutuk hodi koloka iha otél sira no mós pontu-pontu ne’ebé mak atleta sira sei bá realiza jogu sira-ne’e. Importante ami hatene tiha fatin sira-ne’e ita prontu,” José dos Reis dehan.
Jornalista: Felicidade Ximenes
Editór: Xisto Freitas da Piedade
