KOVALIMA, 04 Marsu 2025 (TATOLI) – Inspesaun Jerál Traballu (IJT), munisípiu Kovalima iha 2024 ne’e, identifika empreza lokál no estranjeiru hamutuk 13 mak viola lei traballu.
Inspetór Jerál Traballu Rejionál Munisípiu Kovalima, Gabriel Gusmão informa katak, empreza 13 ne’ebé viola lei traballu ne’e kompostu husi empreza lokál neen no empreza estranjeiru hamutuk hitu.
“Empreza 13 ne’ebé mak ami identifika viola lei traballu hanesan traballadór presta servisu la iha ekipamentu protesaun individuál, kontratu traballu no kartaun autorizasaun traballu inválidu maibé la halo renovasaun”, Gabriel Gusmão relata ba TATOLI, iha Bairru Costa, ohin.
Empreza 13 ne’ebé viola lei traballu ne’ebé iha 2024 IJT identifika hanesan sidadaun ne’ebé mak loke empreza hodi hala’o atividade komérsiu, konstrusaun hanesan otel no seluktan.
Bazeia ba Planu Asaun Anuál (PAA) 2024 ne’e, IJT hala’o vizita de’it empreza 30, maibé iha implementasaun progresu servisu liu, tanba vizita empreza 43 ne’ebé IJT rejista traballadór 321. Husi númeru ne’e kompostu husi traballadór lokál 282 mane 229 no feto 53 totál traballador estranjeiru hamutuk 39. Husi númeru ne’e kompostu husi mane 33 no feto neen.
Hafoin lihusi vizita bainhira IJT identifika empreza viola lei traballu aplika sansaun administrativa depende empreza sira viola lei traballu tanba aplika lei multa lei traballau depende empreza sira viola lei.
“Prosesu momentu ami halo vizita inspesaun ami identifika empreza viola ba dahuluk ami entrega kedas nota inpesaun traballu, hafoin ami marka tempu nune’e hodi fó justifikasaun ba nia violasaun sira bainhira justifikasaun la forti ami foti sansaun hodi aplika multa laborál”, nia dehan.
Ho nune’e, IJT aplika multa laborál depende ba nia kazu hanesan nia violasaun lei traballu mínimu aplika sasaun $ 230 kona-ba violasaun la aprezenta dokumentasaun $ 345 ne’ebé selu iha Banku BNU hafoin simu nia resibu pagamentu.
“Iha 2024 ne’e liuhusi sansaun administrativa ne’ebé ami aplika ona medida sasaun pena multa ba empreza ne’ebé viola lei traballu nune’e kontribui ona osan rihun-10, 920 ne’ebé empreza sira selu iha banku BNU”, nia informa.
Durante presta servisu IJT hasoru difukuldade hanesan menus rekursu umanu, kondisaun edifísiu ladun favoravel atu hala’o servisu no la iha transporte atu kontrola empreza sira iha munisípiu Kovalima, maibé ho dezafiu ne’ebe iha IJT nafatin hala’o servisu hodi kontribui reseita ba kofre Estadu.
Jornalista: Celestina Teles
Editór: Rafael Ximenes de A. Belo
